“Dövlət başçısının Vyetnama səfəri siyasi dialoqu və iqtisadi əməkdaşlığı gücləndirir” - MİLLƏT VƏKİLİ
“Azərbaycan Respublikasının Prezidenti cənab İlham Əliyevin Vyetnam Sosialist Respublikasına rəsmi səfəri Azərbaycan–Vyetnam əməkdaşlığında yeni mərhələnin başlanğıcından xəbər verir. Bu əməkdaşlığın tarixi kökləri təxminən 70 il əvvələ gedib çıxır”.
Bu fikirləri Milli Məclisin Aqrar siyasət komitəsinin sədri Tahir Rzayev SİA-ya açıqlamasında bildirib.
Onun sözlərinə görə, Ulu Öndər Heydər Əliyevin mühüm töhfələri ilə formalaşan dostluq və qarşılıqlı hörmət münasibətləri bu gün yeni məzmunla zənginləşərək inkişaf edir:
” Dövlət başçısının Vyetnama səfəri mövcud əlaqələrin daha da möhkəmləndirilməsi, siyasi dialoqun genişləndirilməsi və iqtisadi əməkdaşlığın yeni istiqamətlərinin müəyyənləşdirilməsi baxımından xüsusi əhəmiyyət daşıyır.
Hələ sovet dövründə Azərbaycan Vyetnamın neft-qaz sənayesinin inkişafına mühüm töhfələr verib. Azərbaycanlı mütəxəssislər bu ölkədə neft hasilatı sahəsində çalışıb, yerli kadrların hazırlanmasında və təcrübə mübadiləsində iştirak ediblər. 1959-cu ildə Vyetnamın o zamankı Prezidenti Ho Şi Minin Bakıya səfəri, 1983-cü ildə isə Heydər Əliyevin rəhbərlik etdiyi nümayəndə heyətinin Vyetnama səfəri ikitərəfli münasibətlərin tarixində mühüm hadisələr olub. Bu tarixi əlaqələr sonrakı illərdə də əməkdaşlığın inkişafı üçün möhkəm zəmin yaradıb.
Vyetnam Kommunist Partiyası Mərkəzi Komitəsinin Baş katibi To Lamın 2025-ci ilin mayında Azərbaycana dövlət səfəri münasibətlərin inkişafında yeni mərhələnin əsasını qoyub. Səfər çərçivəsində Azərbaycan və Vyetnam arasında Strateji Tərəfdaşlığın yaradılması haqqında Birgə Bəyanat qəbul edilib. Energetika, iqtisadi-ticari əlaqələr, müdafiə sənayesi, kibertəhlükəsizlik, nəqliyyat, investisiya və digər sahələrdə əməkdaşlığın genişləndirilməsi ilə bağlı əldə olunan razılaşmalar münasibətlərin institusional əsaslarını gücləndirib.
Dövlət başçılarının görüşləri və danışıqları, hökumətlərarası komissiyaların fəaliyyəti, parlamentlərarası dostluq qruplarının əlaqələri, Yeni Azərbaycan Partiyası ilə Vyetnam Kommunist Partiyası arasında əməkdaşlıq yeni imkanlar yaradır. Bu siyasi və institusional təmaslar ikitərəfli münasibətlərin davamlı inkişafına, qarşılıqlı maraqların uzlaşdırılmasına və əldə olunan razılaşmaların praktiki nəticələrə çevrilməsinə xidmət edir. Belə əməkdaşlıq həm Azərbaycan, həm də Vyetnam üçün uzunmüddətli perspektivlər açır.
Azərbaycan Respublikasının Prezidenti İlham Əliyev Vyetnam Xəbər Agentliyinə verdiyi müsahibəsində dostluq və əməkdaşlığa xüsusi önəm verərək münasibətlərin tarixi köklərinə diqqət çəkib. Dövlət başçısı bildirib ki, Azərbaycan–Vyetnam iqtisadi-ticari əlaqələri mövcud potensialı tam əks etdirmir. Ölkələrimiz ticarət dövriyyəsini əhəmiyyətli dərəcədə artırmaq, enerji sənayesi, kənd təsərrüfatı, nəqliyyat, logistika və digər aparıcı sahələrdə genişmiqyaslı birgə təşəbbüslər həyata keçirmək üçün kifayət qədər imkanlara malikdir. Bu baxımdan, hazırkı səfər iqtisadi münasibətlərin daha konkret layihələr əsasında inkişaf etdirilməsi üçün mühüm fürsətdir.
Son illər Vyetnama 1,1 milyon tondan artıq Azərbaycan nefti ixrac olunub. 2025-ci ilin yekunlarına görə, iki ölkə arasında ticarət dövriyyəsi 150 milyon dolları ötüb. Bununla belə, mövcud göstəricilər əməkdaşlığın real imkanlarını tam əks etdirmir. Hazırda Azərbaycanda Vyetnam investisiyalı yeddi şirkət fəaliyyət göstərir. Azərbaycan Dövlət Neft Şirkəti (SOCAR) ilə Vyetnamın PetroVietnam şirkəti arasında əməkdaşlığın genişləndirilməsi, neft-qaz yataqlarının kəşfiyyatı və işlənməsi, texniki xidmətlər və mütəxəssis hazırlığı kimi istiqamətlər xüsusi əhəmiyyət daşıyır.
Nəqliyyat və logistika sahəsində əməkdaşlıq da böyük perspektivlər vəd edir. Azərbaycanın əlverişli coğrafi mövqeyi, inkişaf etmiş nəqliyyat infrastrukturu və beynəlxalq marşrutlara çıxış imkanları Vyetnamın Avropa bazarlarına daşımalarının təşkilində ölkəmizin rolunu artıra bilər. Xüsusilə Orta Dəhlizin imkanlarından istifadə, yükdaşımaların həcminin artırılması və logistika əlaqələrinin genişləndirilməsi hər iki tərəf üçün iqtisadi fayda vəd edir. Vyetnam şirkətlərinin Azərbaycan vasitəsilə regionun digər bazarlarına çıxışı da bu əməkdaşlığın əhəmiyyətini artırır.
Humanitar əməkdaşlıq, elm, təhsil və mədəniyyət sahələrində əlaqələr də Azərbaycan–Vyetnam münasibətlərinin mühüm istiqamətlərindəndir. Sovet dövründə təxminən 5 min Vyetnam vətəndaşının Azərbaycanda təhsil alması xalqlarımız arasında formalaşmış tarixi əlaqələrin göstəricisidir. Bu gün universitetlərarası əməkdaşlıq, elmi təcrübə mübadiləsi, təhsil proqramları və mədəni tədbirlərin təşkili üçün yeni imkanlar mövcuddur. Heydər Əliyev Fondunun Vyetnamda həyata keçirdiyi humanitar və təhsil təşəbbüsləri də xalqlar arasında dostluq münasibətlərinin möhkəmlənməsinə töhfə verir.
Azərbaycan və Vyetnam beynəlxalq təşkilatlar çərçivəsində də əməkdaşlığa xüsusi önəm verirlər. Birləşmiş Millətlər Təşkilatı, Qoşulmama Hərəkatı və digər beynəlxalq platformalarda qarşılıqlı dialoq və məsləhətləşmələr iki ölkənin beynəlxalq gündəlikdəki məsələlər üzrə mövqelərinin yaxınlaşmasına imkan yaradır. Vyetnamın Cənub-Şərqi Asiyada, Azərbaycanın isə Cənubi Qafqazda malik olduğu strateji mövqe qarşılıqlı təcrübə mübadiləsini və regional əməkdaşlığı daha da əhəmiyyətli edir.
Azərbaycan Prezidentinin Vyetnama rəsmi səfəri çərçivəsində keçirilən görüşlər də münasibətlərin çoxşaxəli xarakterini nümayiş etdirir. Dövlət başçısının Vyetnamın Baş naziri Le Minh Hunq və Milli Assambleyanın sədri Çan Tan Man ilə görüşlərində energetika, müdafiə sənayesi, tikinti, turizm, nəqliyyat və birbaşa aviareyslərin təşkili kimi məsələlər müzakirə olunub. Xüsusilə Azərbaycan vasitəsilə Vyetnam şirkətlərinin regional bazarlara çıxış imkanları və Orta Dəhlizin yaratdığı perspektivlər diqqət mərkəzində olub.
Əlbəttə, Azərbaycan–Vyetnam münasibətlərinin inkişafı hər iki dövlətin iqtisadi potensialının reallaşdırılması, yeni investisiya imkanlarının yaradılması və xalqların rifahının yüksəldilməsi baxımından mühüm əhəmiyyət daşıyır. Prezident İlham Əliyevin Vyetnama səfəri göstərir ki, Azərbaycan xarici siyasətində Asiya ölkələri ilə əlaqələrin genişləndirilməsinə də xüsusi önəm verir. Strateji tərəfdaşlıq çərçivəsində siyasi iradənin konkret iqtisadi, humanitar və infrastruktur layihələri ilə möhkəmləndirilməsi gələcək əməkdaşlığın əsas istiqamətlərindən biri olacaq”.
Bütün xəbərlər Facebook səhifəmizdə




USD
EUR
GBP
RUB