"Vyetnam istiqaməti Azərbaycanın Asiya siyasətində mühüm dayaq nöqtəsinə çevrilə bilər" - ŞƏRH
"Azərbaycan Respublikasının Prezidenti cənab İlham Əliyevin Vyetnam Sosialist Respublikasına rəsmi səfəri və ikitərəfli gündəlikdə duran iqtisadi, ticarət, enerji və humanitar məsələlərin müzakirəsi Bakının Asiya-Sakit okean regionunda çoxşaxəli və praqmatik xarici siyasət xəttinin məntiqi davamı kimi qiymətləndirilə bilər".
Bu barədə fikirlərini Milli Məclisin deputatı Kamran Bayramov SİA-ya açıqlamasında bildirib.
Deputat qeyd edib ki, 2025-ci ildə iki ölkə arasında ticarət dövriyyəsinin 150 milyon ABŞ dollarını keçməsi mövcud iqtisadi əməkdaşlığın artıq ilkin baza həddini aşdığını və yeni keyfiyyət mərhələsinə keçid üçün real zəmin formalaşdırdığını göstərir:
"Vyetnam Cənub-Şərqi Asiyanın sürətlə sənayeləşən, istehsal zəncirlərinə fəal inteqrasiya olunan və regional ticarət sazişləri şəbəkəsində mühüm yer tutan aktorlarından biri kimi Azərbaycan üçün həm birbaşa bazar, həm də daha geniş Asiya məkanına çıxış baxımından əhəmiyyətli imkanlar açır. Ticarət əlaqələrinin dərinləşməsi qeyri-neft ixracının coğrafiyasının genişləndirilməsinə, kənd təsərrüfatı, emal sənayesi, logistika və rəqəmsal həllər sahələrində birgə layihələrin təşviqinə şərait yarada bilər, çünki hər iki dövlət iqtisadiyyatın şaxələndirilməsi və xarici bazarlara çıxış imkanlarının artırılmasında maraqlıdır.
Enerji sahəsində əməkdaşlıq isə yalnız ənənəvi karbohidrogen resursları və texniki təcrübə mübadiləsi ilə məhdudlaşmaya, həm də bərpaolunan enerji, enerji səmərəliliyi və sənaye modernləşməsi kontekstində uzunmüddətli institusional dialoqu gücləndirə bilər. Nəqliyyat-logistika baxımından Azərbaycanın Şərq-Qərb və Şimal-Cənub dəhlizlərinin qovşağında yerləşməsi ilə Vyetnamın dəniz və istehsal mərkəzləri arasında əlaqələrin sıxlaşması Asiya ilə Avropa arasında yüklərin şaxələndirilmiş marşrutlarla daşınması ideyasına əlavə dinamika gətirə bilər.
Siyasi müstəvidə Vyetnamla münasibətlərin fəallaşması Azərbaycana Cənub-Şərqi Asiya regionunda etibarlı və proqnozlaşdırılan tərəfdaş imicini möhkəmləndirməyə, beynəlxalq və regional platformalarda qarşılıqlı dəstək mexanizmlərini genişləndirməyə imkan verir. Eyni zamanda humanitar, təhsil və mədəni əlaqələrin inkişafı, tarixi bağların müasir praqmatik maraqlarla uzlaşdırılması iki cəmiyyət arasında institusional etimadı dərinləşdirir və siyasi-iqtisadi razılaşmaların dayanıqlı sosial dayaq qazanmasına xidmət edir.
Ümumilikdə, 150 milyon dollarlıq ticarət göstəricisinin arxasında dayanan artım potensialı düzgün institusional mexanizmlər, biznes dairələrinin birbaşa təmasları və nəqliyyat-logistika uyğunlaşdırılması ilə dəstəkləndiyi təqdirdə, Vyetnam istiqaməti Azərbaycanın Asiya siyasətində həm iqtisadi diversifikasiya, həm də diplomatik çəkinin artırılması baxımından mühüm dayaq nöqtələrindən birinə çevrilə bilər".
Bütün xəbərlər Facebook səhifəmizdə




USD
EUR
GBP
RUB