.jpg)
"Qida məhsullarının etiket və tərkib məlumatlarının sadələşdirilməsi son illərdə qida təhlükəsizliyi və istehlakçı hüquqları sahəsində əsas müzakirə mövzularından birinə çevrilib". Bu sözləri SİA-ya açıqlamasında qida mühəndisi, nutrisioloq Fərid Səfərov deyib.
Onun sözlərinə görə, bu yanaşma, xüsusilə qida savadlılığının artırılması və sağlam seçimlərin təşviqi baxımından olduqca effektiv hesab olunur: "Sadələşdirilmiş etiketlər istehlakçı anlayışını artırır. Ənənəvi etiketlərdə çox vaxt texniki terminlər – məsələn, E əlavələri, qida maddələrinin kimyəvi adları və ya enerji dəyərləri göstərilir ki, adi alıcı bunları asanlıqla anlamır. Sadə və aydın formada təqdim olunan məlumatlar – “yüksək duz tərkibli” və ya “az şəkərli məhsul” kimi ifadələr – istehlakçının məhsulu saniyələr içində dəyərləndirməsinə kömək edir. Bu cür məlumat forması həm də sağlam seçimləri təşviq edir. Şəkər, duz və yağ miqdarının sadə şəkildə göstərilməsi istehlakçının daha sağlam məhsulları seçməsinə imkan yaradır. Beləliklə, insanlar gündəlik qida rasionlarını daha şüurlu şəkildə formalaşdırırlar.
Sadələşdirilmiş məlumatların tətbiqi eyni zamanda qida savadlılığını da yüksəldir. Qısa, vizual və aydın məlumatlar xüsusilə uşaqlar, yaşlılar və az təhsilli istehlakçılar üçün daha əlçatan olur. Uzunmüddətli dövrdə bu, insanların məhsul etiketlərinə marağını artırır və nəticədə qida savadlılığı ümumilikdə yüksəlir. Bu proses istehsalçı şəffaflığını da artırır. Sadə və standartlaşdırılmış etiketlər şirkətləri daha məsuliyyətli davranmağa vadar edir, çünki məhsulun “qırmızı zona”ya düşməsi reputasiya baxımından mənfi təsir yarada bilər. Bununla belə, bəzi məhdudiyyətlər də mövcuddur. Hər ölkədə eyni standartların tətbiqi çətinlik yaradır və bəzən istehsalçılar məlumatı manipulyasiya edərək məhsula “sağlam” imici qazandırmağa çalışırlar. Bütün bunlara baxmayaraq, sadələşdirilmiş etiketləmə istehlakçıların məlumatlı, şüurlu və sağlam seçimlər etməsinə mühüm töhfə verir".
Bütün xəbərlər Facebook səhifəmizdə
.jpg)
USD
EUR
GBP
RUB
