Azərbaycan Turizm və Menecment Universitetinin (ATMU) təşkilatçılığı ilə “Müasir dövrdə effektiv idarəetmənin problemləri” mövzusunda respublika elmi-praktik konfransı keçirilib. SİA-nın məlumatına görə, tədbirdə çıxış edən ATMU-nun rektoru İlham Mədətov konfransın keçirilməsinin əsas məqsədinin müasir dövrümüzdə idarəetmə sistemində təzahür edən modernləşmə və yeni idarəetmə modellərinin, müasir vətəndaşı məmnun edən idarəetmənin qurulmasının zəruriliyini üzə çıxarmaqdan ibarət olduğunu söyləyib.
Rektor bildirib ki, idarəetmə sosial, siyasi funksiya daşıyaraq ictimai həyatımızın bütün sferalarında müxtəlif istiqamətlərdə özünü göstərir. İdarəetmə ictimai həyatımızın bütün sferalarının tənzimlənməsində, davamlı inkişafın, rifah və məmnunluq səviyyəsinin təmin olunmasında, peşəkar və səmərəli fəaliyyətin formalaşdırılmasında böyük əhəmiyyət kəsb edir. Spesifik fəaliyyət növü olan idarəetmə tələbatların və fəaliyyət formalarının uzlaşdırılması vasitəsilə inkişaf proseslərinin tənzimlənməsinə yönələn xüsusi sosial funksiya kimi, hər dövrün öz obyektiv zərurətindən irəli gələn modellər və metodlar əsasında həyata keçirilir.
Tədbirin moderatoru, universitetin beynəlxalq əlaqələr şöbəsinin müdiri Orxan Musa ATMU tərəfindən bu konfransın dörd ildir keçirildiyini bildirib.
Konfransda İqtisadi İslahatların Təhlili və Kommunikasiya Mərkəzinin icraçı direktoru, iqtisad elmləri doktoru Vüsal Qasımlı “Strateji idarəetmə: effektivlik, hesabatlılıq və şəffaflıq” mövzusunda məruzə ilə çıxış edib. O, strateji idarəetmədən, dövlət və biznes idarəetməsinin modellərindən, həmçinin bu sahədə dövlət və özəl qurumların birgə əməkdaşlığından, müasir dövrdə idarəetmənin problemlərindən söz açıb.
V.Qasımlı konfransda müzakirə olunan məsələlərin sonralar dövlət siyasətində və biznesin inkişaf etdirilməsində öz vacib praktik tətbiqini tapacağına və əhəmiyyətli rol oynayacağına əminliyini bildirib.
Dövlət Turizm Agentliyinin nümayəndəsi Elvin Yusifli, Azərbaycan Dövlət Aqrar Universitetinin əməkdaşı Asif Həsənov və digər çıxış edənlər konfransın mövzusunun aktual olduğunu söyləyib, tədbirin fərqli sahələrdə fəaliyyət göstərən tərəfdaş qurumlar arasında əməkdaşlığın qurulmasına, şəbəkələşmə və yeni elmi yaradıcılıq imkanlarının yaradılmasına mühüm töhfə verəcəyini qeyd ediblər.
Konfrans işini “İqtisadiyyatda müasir yanaşmalar və inkişaf tendensiyaları”, “Xidmət sektorunda idarəetmə tendensiyaları” və “Sosial sahələrin idarə edilməsi” mövzularında bölmələrdə davam etdirib. Bölmə iclaslarında müvafiq dövlət qurumlarının nümayəndələrinin müxtəlif sahələr üzrə məruzələri dinlənilib. Onu da qeyd edək ki, konfransa respublikanın 20 ali məktəbindən 65 məruzə təqdim edilib.
Bütün xəbərlər Facebook səhifəmizdə
USD
EUR
GBP
RUB