ATMU-da "Erməni yalanları" adlı tədbir keçirilib FOTOLAR

Azərbaycan Turizm və Menecment Universitetində (ATMU) "Erməni yalanları" mövzusunda "dəyirmi masa" keçirilib. Mədəniyyət və Turizm Nazirliyindən SİA-ya verilən xəbərə görə, universitetin rektoru, professor Cəfər Cəfərov son 20 ildən artıq dövrdə torpaqlarımızın 20%-dən çoxunu işğal etmiş ermənilərin ölkəmizə və xalqımıza qarşı təcavüzkar siyasətindən danışıb. Bildirib ki, mənfur düşmənlərimiz tarixi saxtalaşdırmaqla, özlərini bu regionun aborigen əhalisi kimi qələmə verməyə çalışır, qədim Azərbaycan mədəni-tarixi abidələrini öz adlarına çıxarırlar. Erməni yalanlarının ifşası istiqamətində mühüm tədbirlərin keçirilməsini, tədqiqatların aparılımasını zəruri sayan rektor onu da qeyd edib ki, bu gün müstəqil Azərbaycan dövləti öz tarixinə və keçmişinə, mədəniyyətinə sahib çıxır.

Milli Məclisin deputatı, siyasi elmlər doktoru Hikmət Məmmədov ermənilərin zaman-zaman ərazilərimizə, tariximizə və mədəniyyətimizə qarşı iddialar səsləndirdiyini, özlərini bu regionda tarixən yaşamış xalq qismində qələmə vermək üçün min bir yalana əl atdıqlarını bildirib.

Alim, həmçinin, ermənilərin bu regionda yerləşdirilməsi ilə bağlı apardığı tədqiqatlarından danışıb, əldə etdiyi tarixi faktları diqqətə çatdırıb.

H.Məmmədov bildirib ki, müasir Azərbaycan dövləti öz milli keçmişinə sahib çıxır, ulu öndər Heydər Əliyevin azərbaycançılıq məfkurəsi ətrafında sıx birləşən xalıqımız mənfur ermənilərə qarşı qətiyyətli mübarizə aparır: "Ermənilərin törətdiyi soyqırımları Azərbaycan xalqının qan yaddaşıdır. Bu gün xalqımız Prezident İlham Əliyevin ətrafında sıx birləşərək, Azərbaycan torpaqlarına, tarixi keçmişimizə iddia edən, ölkəmizə qarşı informasiya müharibəsi aparan mənfur düşmənlərə layiqli cavab verir.

Digər çıxış edənlər də aparılan tədqiqatların vacibliyini vurğulayıblar. Qeyd edilib ki, erməni yalanlarını ifşa edən belə faktlar cəmiyyətə yaxından tanıdılmalı, bununla bağlı kütləvi tədbirlər təşkil edilməlidir.

Tədbir müzakirələrlə davam etdirilib.

Bütün xəbərlər Facebook səhifəmizdə