...Reuters agentliyinin məlumatlı mənbələrə istinadən verdiyi məlumata görə, Səudiyyə Ərəbistanı Yaxın Şərqdə böyük bir müharibənin davam etdiyi bir vaxtda İran ərazisinə bir sıra açıqlanmayan hava hücumları həyata keçirib.
Bu, Səudiyyə Ərəbistanı ordusunun İran ərazisinə birbaşa zərbə endirməsinin ilk məlum nümunəsidir.
İki Qərb rəsmisinin sözlərinə görə, Səudiyyə Ərəbistanı Hərbi Hava Qüvvələrinin hücumları martın sonlarında baş verib və İranın krallığa hücumlarından sonra "tək-tək zərbələr" olub. Agentlik zərbələrin dəqiq hədəflərini təsdiqləyə bilməyib. Səudiyyə Ərəbistanı əməliyyatı rəsmi olaraq təsdiqləməyib və İran Xarici İşlər Nazirliyi jurnalistlərin sorğularına cavab verməyib.
...Reuters-in məlumatına görə, ABŞ və İsrailin 28 fevralda İrana hava hücumları başlatmasından sonra münaqişə xeyli şiddətlənib.
Buna cavab olaraq Tehran Körfəz Əməkdaşlıq Şurasının bütün altı dövlətinə hücum edib. İran təkcə Amerika bazalarına deyil, həm də mülki infrastruktur, hava limanları və neft obyektlərinə zərbələr endirib.
Tehran həmçinin Hörmüz boğazını bağlayaraq qlobal ticarətdə pozuntulara səbəb olub.
Ər-Riyad və Tehran gərginliyi azaltmaq barədə razılığa gəliblər...
Zərbələrdən sonra Səudiyyə Ərəbistanı ilə İran arasında intensiv diplomatik əlaqələr başlayıb. İran və Qərb rəsmilərinin sözlərinə görə, tərəflər sonda qeyri-rəsmi deeskalasiya razılaşmasına nail olublar.
Bir İran rəsmisi bildirib ki, razılaşma "hərbi əməliyyatlara son qoymaq, qarşılıqlı maraqları qorumaq və eskalasiyanın daha da artmasının qarşısını almaq" məqsədi daşıyır.
Qeyri-rəsmi atəşkəs ABŞ və İranın 7 apreldə daha geniş atəşkəs barədə razılığa gəlməsindən təxminən bir həftə əvvəl qüvvəyə minib.
Hücumlar ərəfəsində Səudiyyə Ərəbistanının xarici işlər naziri Şahzadə Feysəl bin Fərhan krallığın hərbi cavab vermək hüququnu özündə saxladığını bildirib.
Ər-Riyad daha sonra İranın hərbi attaşesini və dörd diplomatı ölkədən çıxarıb.
Reuters-in məlumatına görə, Səudiyyə Ərəbistanı 25-31 mart tarixləri arasında 105-dən çox raket və pilotsuz təyyarə hücumuna məruz qalıb.
Aprelin əvvəlinə qədər hücumların sayı artıq xeyli azalıb. Keçmiş Səudiyyə kəşfiyyat rəisi Şahzadə Turki əl-Feysəl "Arab News" üçün yazdığı bir köşədə krallıq rəhbərliyinin qəsdən ölkəni "məhv ocağına" çəkməkdən yayınmağa çalışdığını yazıb.
Əli Babayev
Bütün xəbərlər Facebook səhifəmizdə
USD
EUR
GBP
RUB