NASA alimləri, planetimiz üçün potensial təhlükə yarada biləcək 2024 YR4 asteroidinin trayektoriyasını və fiziki xüsusiyyətlərini daha dəqiq müəyyənləşdirmək məqsədilə dünyanın ən güclü teleskoplarından biri olan “Ceyms Uebb” teleskopunu (JVST) bu obyektə yönəldəcək. SİA “The Independent” nəşrinə istinadla xəbər verir ki, sözügedən asteroid ilk dəfə 2024-cü ilin dekabrında kəşf edilib. İlkin hesablamalara əsasən, onun diametri 40 metrdən 90 metrə qədər dəyişir. Lakin onun Günəş sistemindəki trayektoriyası ilə bağlı yeni məlumatlar alimləri bu obyektin Yerlə toqquşma ehtimalını yenidən qiymətləndirməyə vadar edib. Mövcud hesablamalara görə, asteroidin 2028-ci ildə Yerə yaxınlaşması ehtimalı yüksəkdir, lakin onun trayektoriyası hələ də dəqiqləşdirilməlidir.
Alimlər asteroidin optik xüsusiyyətlərinə əsaslanan ölçülərin qeyri-müəyyən olduğunu bildirirlər. Ceyms Uebb” teleskopununun infraqırmızı diapazonda müşahidə aparmaq qabiliyyəti isə asteroidin istilik emissiyasını təhlil etməyə və onun real ölçüsünü daha dəqiq qiymətləndirməyə imkan verəcək. Bu tədqiqat çərçivəsində NASA, Avropa Kosmik Agentliyi (ESA) və Kanada Kosmik Agentliyi (CSA) birlikdə fəaliyyət göstərir. Teleskopun müşahidələri 2025-ci ilin mart ayında aparılacaq. Bu zaman asteroid teleskop üçün ən əlverişli mövqedə olacaq və müşahidələrin daha yüksək dəqiqliklə aparılmasına imkan yaradacaq. Məlumatların təhlili nəticəsində asteroidin trayektoriyası və fiziki xüsusiyyətləri ilə bağlı daha etibarlı proqnozlar vermək mümkün olacaq. Bu tədqiqatın nəticələri yalnız 2024 YR4 asteroidinin mümkün təhlükəsini qiymətləndirməyə deyil, həm də gələcəkdə potensial təhlükəli asteroidlərin aşkarlanması və müşahidəsi üçün metodologiyaların təkmilləşdirilməsinə töhfə verəcək.
Bütün xəbərlər Facebook səhifəmizdə
USD
EUR
GBP
RUB
