Birləşmiş Millətlər Təşkilatının (BMT) 78-ci Baş Assambleyasının prezidenti Dennis Frensis Ermənistanın Azərbaycan torpaqlarını işğalı zamanı yerləşdirdiyi minaların narahatlıq doğurduğunu deyib.
SİA-nın əldə etdiyi məlumata görə, Frensis 19-26 sentyabr tarixlərində ABŞ-ın Nyu-York şəhərində keçirilən Baş Assambleyanın müzakirələrindən sonra mətbuat konfransı keçirib.
Frensis Ermənistanın Azərbaycan torpaqlarını işğal etdiyi dövrdə 1 milyona yaxın mina basdırmasını və minaların yerləşdiyi yerlə bağlı məlumatı paylaşmamasını necə dəyərləndirməsi ilə bağlı suala münasibət bildirərək deyib ki, bu vəziyyət narahatlıq doğurur.
Frensis vurğulayıb ki, beynəlxalq hüquqa uyğun olaraq, bəzi kateqoriyalı silahlar münaqişələrdə istifadə edilməməlidir.
“Mən bütün münaqişə tərəflərini beynəlxalq hüquq kontekstində öhdəliklərini yerinə yetirməyə çağırıram”, -deyə o qeyd edib.
Sözügedən silah kateqoriyalarının “ağrı və qəddarlıq” yaratdığını deyən Frensis humanitar təsirlərin də nəzərə alınmasının vacibliyini dilə gətirib.
Qeyd edək ki, Azərbaycan Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev "1991-ci ildən bu yana 3 min 385 azərbaycanlı Ermənistanın basdırdığı minaların qurbanı olub. Ermənistan və qanunsuz kukla xunta rejimi Ermənistanda istehsal olunan minaları "boz zona"nın hər tərəfinə yerləşdirməkdə davam edir" ifadələrindən istifadə etmişdi.
Bütün xəbərlər Facebook səhifəmizdə
USD
EUR
GBP
RUB