“İkinci Beynəlxalq İnvestisiya Forumu Azərbaycanın yeni iqtisadi imkanlarını dünyaya təqdim edir” - ŞƏRH
“Bakıda keçirilən İkinci Azərbaycan Beynəlxalq İnvestisiya Forumunu ölkəmizin beynəlxalq iqtisadi mövqeyinin möhkəmləndirilməsi və yeni investisiya imkanlarının təqdim olunması baxımından mühüm hadisə hesab edirəm. Prezident İlham Əliyevin himayəsi altında keçirilən forumun dünyanın aparıcı investorlarını, dövlət və hökumət nümayəndələrini, beynəlxalq maliyyə institutlarını və biznes liderlərini bir araya gətirməsi Azərbaycanın artıq yalnız investisiya qəbul edən ölkə deyil, həm də regional iqtisadi əməkdaşlığın mühüm platformalarından birinə çevrildiyini göstərir”. Bu sözləri SİA-ya açıqlamasında deputat Jalə Əliyeva deyib.
Onun sözlərinə görə, forumun builki mövzusu da təsadüfi seçilməyib:
“Qlobal iqtisadiyyatda geosiyasi dəyişikliklərin, təchizat zəncirlərinin yenidən qurulmasının, yeni nəqliyyat və enerji marşrutlarının formalaşmasının investisiya mühitinə ciddi təsir göstərdiyi bir dövrdə Cənubi Qafqazın bağlantı və investisiya sabitliyi baxımından rolunun müzakirəyə çıxarılması xüsusi əhəmiyyət daşıyır.
Azərbaycanın coğrafi mövqeyi, nəqliyyat infrastrukturu və həyata keçirdiyi regional layihələr ölkəmizə bu proseslərdə mühüm imkanlar yaradır. Xüsusilə Orta Dəhlizin inkişafı, Şərq-Qərb və Şimal-Cənub bağlantılarının genişləndirilməsi, enerji və rəqəmsal əlaqələrin gücləndirilməsi Azərbaycanın regional iqtisadi mərkəz kimi əhəmiyyətini artırır. Forum çərçivəsində Orta Dəhliz, enerji və yaşıl keçid, süni intellekt və rəqəmsal transformasiya, infrastruktur, sənaye, kritik xammal, aqrobiznes, maliyyə, turizm və insan kapitalına investisiyalar kimi istiqamətlərin müzakirəsi də bunu təsdiqləyir.
Burada xüsusi vurğulanmalı məqamlardan biri Azərbaycanın investisiya gündəliyinin dəyişməsidir. Əvvəllər xarici investor üçün Azərbaycan daha çox enerji resursları ilə assosiasiya olunurdusa, bu gün qeyri-neft sektorunun, sənayenin, logistikanın, yaşıl enerjinin, rəqəmsal iqtisadiyyatın, kənd təsərrüfatının, turizmin və azad iqtisadi zonaların yaratdığı imkanlar getdikcə daha çox ön plana çıxır.
Birinci Azərbaycan Beynəlxalq İnvestisiya Forumunun nəticələri də bu baxımdan diqqətəlayiqdir. 2025-ci ildə keçirilən ilk forumda 1000-dən çox iştirakçı bir araya gəlib və ümumi dəyəri 10 milyard ABŞ dollarından çox olan investisiya sazişləri imzalanıb. Bunun 7 milyard dollardan çox hissəsinin qeyri-neft sektoruna aid olması iqtisadiyyatın şaxələndirilməsi baxımından mühüm göstəricidir. İkinci forumun əhəmiyyəti isə yalnız yeni müqavilələrin və investisiya razılaşmalarının əldə olunması ilə məhdudlaşmır. Belə platformalar Azərbaycanı beynəlxalq biznes dairələri ilə birbaşa dialoq məkanına çevirir. İnvestorlar ölkənin iqtisadi potensialını, həyata keçirilən layihələri və gələcək imkanları daha yaxından öyrənir, Azərbaycan şirkətləri isə yeni tərəfdaşlarla əlaqələr qurmaq imkanı əldə edirlər.
Digər mühüm məqam Azərbaycanın özünü regional bağlantıların əsas halqalarından biri kimi təqdim etməsidir. Bu gün nəqliyyat, enerji, rəqəmsal bağlantı və logistika layihələri artıq yalnız iqtisadi məsələ deyil, həm də uzunmüddətli investisiya sabitliyinin mühüm komponentləridir. Azərbaycanın bu istiqamətlərdə həyata keçirdiyi siyasət ölkənin investisiya cəlbediciliyini daha da genişləndirə bilər.
Forumun Bakıda keçirilməsi də özlüyündə mühüm mesajdır. Azərbaycanın beynəlxalq tədbirlərə ev sahibliyi etmək təcrübəsi, müxtəlif ölkələr və beynəlxalq institutlarla geniş əməkdaşlıq əlaqələri, eləcə də son illərdə formalaşmış yeni regional reallıqlar ölkəmizin iqtisadi dialoq üçün əlverişli məkan kimi təqdim olunmasına imkan verir.
Hesab edirəm ki, İkinci Azərbaycan Beynəlxalq İnvestisiya Forumunun əsas nəticəsi ideyaların konkret layihələrə, dialoqların real biznes tərəfdaşlıqlarına və investisiya imkanlarının yeni iqtisadi təşəbbüslərə çevrilməsi olmalıdır. Bu baxımdan forum Azərbaycanın postneft iqtisadi inkişaf strategiyasının, qeyri-neft sektoruna investisiyaların artırılması siyasətinin və ölkənin regional iqtisadi bağlantılardakı rolunun gücləndirilməsi baxımından mühüm platformadır.
Ən əsası isə budur ki, Azərbaycan bu gün investisiyanı yalnız maliyyə resursu kimi deyil, yeni texnologiya, yeni istehsal, yeni iş yerləri, insan kapitalının inkişafı və uzunmüddətli iqtisadi tərəfdaşlıq imkanı kimi qiymətləndirir. Bu yanaşma ölkəmizin davamlı və şaxələndirilmiş iqtisadi inkişafına xidmət edən mühüm istiqamətdir”.
Bütün xəbərlər Facebook səhifəmizdə
.jpg)
.jpg)
USD
EUR
GBP
RUB