Azərbaycanda mənzil kirayəsi haqqının ödənilməsində maddi köməyə kəskin ehtiyacı olan tələbələrə ünvanlılıq prinsipi əsasında aylıq müavinətin müəyyən edilməsi təklif olunur.
SİA əldə etdiyi məlumata istinadən xəbər verir ki, bu, parlamentin İnsan hüquqları komitəsində 1 martda müzakirəyə çıxarılacaq Azərbaycan Respublikasının İnsan hüquqları üzrə müvəkkilinin (Ombudsmanın) 2021-ci il üzrə məruzəsində əksini tapıb.
Bildirilib ki, dövlət sifarişi əsasında ali və orta ixtisas təhsili müəssisələrinə qəbul olunan və orada təhsil alan, lakin müvafiq yataqxanalarda yerlə təmin edilməyən, mənzil kirayəsi haqqının ödənilməsində maddi köməyə kəskin ehtiyacı olan tələbələrə ünvanlılıq prinsipi əsasında aylıq müavinətin müəyyən edilməsinə, həmçinin tələbə yataqxanaları şəbəkəsinin genişləndirilməsinə böyük ehtiyac var.
Dövlət hər bir vətəndaşın təhsil alması üçün müvafiq şəraitin yaradılmasına təminat verir və təhsilin hər hansı pilləsindən, səviyyəsindən və formasından məhrum edilməsinə yol vermir. Bununla yanaşı, dövlət cinsindən, irqindən, dilindən, dinindən, siyasi əqidəsindən, etnik mənsubiyyətindən, sosial vəziyyətindən, mənşəyindən, sağlamlıq imkanlarından asılı olmayaraq, hər bir vətəndaşa təhsil almaq imkanı yaradılmasına və ayrı-seçkiliyə yol verilməməsinə təminat verir.
Qeyd edək ki, Azərbaycan Respublikasının ali məktəblərinə qəbul imtahanlarında ən yüksək nəticə göstərmiş tələbələrə verilən təqaüdün məbləği artırılıb.
Bu, Prezident İlham Əliyevin bu gün imzaladığı "Azərbaycan Respublikasının ali məktəb tələbələri üçün Prezident təqaüdünün təsis edilməsi haqqında" Azərbaycan Respublikası Prezidentinin 2001-ci il 3 sentyabr tarixli 564 nömrəli Fərmanında dəyişiklik edilməsi barədə" fərmanda əksini tapıb.
Fərmana əsasən, Azərbaycanın ali məktəblərinə qəbul imtahanlarında ən yüksək nəticə göstərmiş 102 tələbə üçün təsis edilmiş Prezident təqaüdünün məbləği 210 manatdan 250 manata qaldırılıb.
Qeyd edək ki, bu Fərman 2022-ci il yanvarın 1-dən tətbiq edilir.
Bütün xəbərlər Facebook səhifəmizdə
USD
EUR
GBP
RUB