Bu gün Dövlət Qulluqçularının peşə bayramı günü Lənkəranda təntənə ilə qeyd edildi. SİA-nın Cənub bürosunun məlumatına görə, əvvəlcə Lənkəran Şəhər İcra Hakimiyyətinin başçısı Taleh Qaraşov, İcra başçısının müavinləri, İcra Aparatının kollektivi və rayonda fəaliyyət göstərən müəssisələrin dövlət qulluqçuları Heydər Əliyev Xatirə parkına gələrək Ulu Öndərin abidəsini ziyarət etdilər, abidənin önünə təzə-tər gül dəstələri düzdülər.
Sonra ŞİH-nin iclas zalında bayram tədbiri keçirildi.
Tədbiri giriş sözü ilə açan Lənkəran ŞİH-nin başçısı Taleh Qaraşov bütün dövlət qulluqçularına təbriklərini çatdıraraq qeyd etdi ki, bu gün müstəqil Azərbaycanın dövlətçiliyinin möhkəmləndirilməsində, sosial-iqtisadi proqramların həyata keçirilməsində dövlət qulluqçuları fəal mövqe nümayiş etdirərək Vətənə, cəmiyyətə layiqincə xidmət göstərirlər.
İcra başçısı hazırda Lənkəranda sağlam ab-havanın, işgüzar əhval-ruhiyyənin hökm sürdüyünü, İcra Aparatında və digər müəssisələrdə çalışan dövlət qulluqçularının öz peşələrinə sədaqətli olduqlarını vurğuladı, son illərdə rayonda qazanılan uğurlarda onların zəhmətini xüsusi qeyd etdi, rayonumuzda aparılan genişmiqyaslı tikinti, quruculuq və abadlıq işlərindən danışdı, Lənkərana göstərdiyi yüksək diqqət və qayğıya görə Azərbaycan Prezidenti cənab İlham Əliyevə dövlət qulluqçuları adından minnətdarlığını bildirdi.
Kadrların peşə hazırlığı məsələlərindən ətraflı söz açan Taleh Qaraşov yekunda bütün dövlət qulluqçularını əlamətdar gün münasibətilə bir daha təbrik etdi, onlara ən səmimi arzularını çatdırdı və fəaliyyətlərində yeni-yeni uğurlar arzuladı.
Sonra Lənkəran ŞİH başçısı Aparatında Ərazi idarəetmə və yerli özünüidarəetmə orqanları ilə iş şöbəsinin müdiri Əlimərdan Əliyevin məruzəsi dinlənildi. Natiq Ulu Öndər Heydər Əliyevin 1993-cü ildə ikinci dəfə siyasi hakimiyyətə qayıdışından sonra dövlət qulluğunda çalışanların əməyinə mühüm diqqət və qayğı göstərilməsindən, hazırda möhtərəm Prezidentimiz cənab İlham Əliyevin bu siyasəti uğurla davam etdirməsindən, dövlət qulluqçularının səmərəli fəaliyyətinin dövlət başçısı tərəfindən yüksək səviyyədə qiymətləndirilməsindən danışdı, Lənkəranda müxtəlif idarə və təşkilatlarda çalışan dövlət qulluqçularının əməyindən, onların bu şərəfli adı öz fədakar əməyi ilə layiqincə doğrultmalarından söz açdı.
Məruzəçi Dövlət Qulluqçuları gününün respublikamızın hər yerində olduğu kimi, Lənkəranda da təntənə ilə qeyd olunmasını xüsusi vurğuladı, bu əlamətdar gün münasibətilə bütün dövlət qulluqçularını təbrik etdi.
Sonda dövlət qulluğunda fərqlənənlərin bir qrupuna Lənkəran ŞİH-nin Fəxri fərmanları və qiymətli hədiyyələri təqdim olundu.
Sərraf Mirsəfəroğlu
Bütün xəbərlər Facebook səhifəmizdə
USD
EUR
GBP
RUB