Bu gün Azərbaycan Dövlət Musiqili Komediya Teatrında akademik Cəlal Əliyevin 85 illik yubileyinə həsr olunmuş "Davamlılıq üçün fotosintez tədqiqatları - 2013: Akademik Cəlal Əliyev" mövzusunda beynəlxalq konfrans öz işinə başlayıb. SİA-nın məlumatına görə, iyunun 9-na qədər davam edəcək konfransda dünyanın 37 ölkəsindən 300-ə yaxın mütəxəssis iştirak edir.
Azərbaycanın rabitə və informasiya texnologiyaları naziri Əli Abbasov konfransda çıxış edərək deyib ki, Azərbaycanda bir çox beynəlxalq tədbirlərin keçirilməsi bir tərəfdən Azərbaycanın son illər qazandığı uğurlar, beynəlxalq və regional problemlərin həllində verdiyi töhvələr, digər tərəfdən isə ölkədə biliklərə əsaslanan yeni bir dövrün başlanması ilə əlaqədardır. O bildirib ki, Azərbaycan həm regionda, həm də dünyada ərzaq, enerji təhlükəsizliyi kimi böyük problemlərin həllində öz töhvələrini verməkdədir: "Əslində fotosintez prosesinə kənardan baxanda sadə bir formul, kiçik proses kimi görünür. Lakin fotosintezlə bağlı uzun müddətdir ki, tədqiqatlar həyata keçirilsə də, onun fundamental problemləri hələ də qalır. Konfransın keçirilməsi də mövcud problemlərin həllinə yönəlib. Konfransda fotosintez prosesinin bütün istiqamətləri, onun praktiki təsiri, kənd təsərrüfatında tətbiqi, həmçinin hidrogenin alınması və süni fotosintez kimi problemlər haqda geniş müzakirələr aparılacaq".
Nazir çıxışında akademik Cəlal Əliyevin elmi fəaliyyəti ilə bağlı məlumat verərək bildirib ki, o, 50 ildən çox elmi fəaliyyətlə məşğul olaraq Azərbaycan elminin inkişafına bir çox töhvələr verib: "Onun elm sahəsində əsas nəticələrindən biri də 70-ci illərdə biologiya elminə digər elmlərin müdaxiləsini başlatmaqla əlaqədardır. Ölkədə bio-informatika kimi elmin yaranmasında onun rolu danılmazdır".
Daha sonra Əli Abbasov Prezident İlham Əliyevin akademik Cəlal Əliyevi təltif etdiyi "Şərəf" ordenini yubilyara təqdim edib.
Elm xadimi Cəlal Əliyev isə konfransda çıxışında deyib ki, prezident İlham Əliyevin rəhbərliyilə ölkədə elmin inkişafına şərait yaradılır, intellektual sahələrə böyük diqqət və qayğı göstərilir: "Bu kimi səylər ölkə iqtisadiyyatının inkişafına böyük imkan yaradır. Dünya ölkələrinə nəzər salsaq görərik ki, iqtisadiyyatı yüksək olan ölkələrdə inkişaf etmiş elm mövcuddur. Ölkəmizdə də elmin inkişafına şərait yaradılıb, bu sahəyə xüsusi diqqət göstərilir".
Konfrans qonaqların müxtəlif mövzularda çıxışları ilə davam edib.
Qeyd edək ki, Azərbaycan Milli Elmlər Akademiyası, AMEA Botanika İnstitutu və Fotosintez Tədqiqatları üzrə Beynəlxalq Cəmiyyətin (İSPR) birgə təşkilatçılığı ilə keçirilən konfransın ilk günündə 9 sessiya aparılacaq, bu sessiyalarda gənc alimlərin məruzələri dinləniləcək.
Bütün xəbərlər Facebook səhifəmizdə
USD
EUR
GBP
RUB