“Cənab Prezident İlham Əliyev İranın ölkəmizə təyin edilmiş səfirini qəbul edərkən bir sıra vacib məqamlara toxunub. Qeyd etməliyik ki, Azərbaycan İslam həmrəyliyinin möhkəmləndirilməsi işinə öz töhfəsini hər zaman verib və bu istiqamətdə böyük səylər göstərib”. Bunu SİA-ya millət vəkili Ceyhun Məmmədov deyib.
Deputatın sözlərinə görə, Azərbaycan İslam aləminin birləşməsi və bəzi ölkələr arasında mövcud olan problemlərin həlli istiqamətində hər zaman öz əlavə səylərini göstərib: “2017-ci il ölkəmizdə “İslam Həmrəyliyi elan edildi, eyni zamanda ölkəmizdə İslam həmrəyliyi oyunları keçirildi. İslam Əməkdaşlıq Konfransı çərçivəsində Azərbaycan İslam ölkələri ilə sıx əməkdaşlıq edir. Ölkəmiz İslam dünyasından da eyni münasibəti gözləyir. Ermənistan Azərbaycan torpaqlarını işğal edib. Bu işğal nəticəsində həmin ərazilərdə mövcud bütün tarixi, mədəni, dini abidələr məhv edilib. İşğal nəticəsində həmin ərazilərdəki məscidlər ermənilər tərəfindən dağıdılıb, vandalizmə məruz qalıb. Bu gün Ermənistan tərəfindən məscidlərdə heyvanlar saxlanılır. Ermənilər işğaldakı dini simvollara qarşı təhqir və vandalizm həyata keçirir. Bu artıq xarakterik hal alıb. İşğal siyasəti nəticəsində ermənilər həmin ərazilərin bir hissəsini tamamilə dağıdıb. Oradakı tarixi abidələrin bir qismi məhv edilib. Digərləri isə özününküləşdirmə adı ilə dəyişikliyə məruz qalıb”.
C.Məmmədov bildirib ki, Şuşa, Ağdam məscidləri bu gün islam adına yaraşmayan bir tərzdə vandalizmə məruz qalır: “Azərbaycanda dini mənəvi dəyərlərə hər zaman diqqət və qayğı olub. Bir neçə il öncə ölkəmizdə “İslam Həmrəyliyi ili” elan edilib. Məscidlər təmir edilib və bərpa edilib. Ölkəmizdə milli-mənəvi dəyərlərə, dini abidələrə diqqət və qayğı mövcuddur”.
Millət vəkili qeyd edib ki, bu işğalçı Ermənistan müsəlman ölkələri ilə sıx əlaqələr qurmağa cəhd edir: “Ermənistan hazırda özünü müsəlman ölkələrinin “dostu” kimi qələmə verməyə çalışır. Amma reallıqda işğalçı ölkə tərəfindən Dağlıq Qarabağda Azərbaycanın qədim torpaqları olan İrəvanda, Zəngəzurda dini abidələri dağıdıb, məhv edib. Bu isə Ermənistan tərəfindən dünya mədəni irsinə qaşı təşkil edilmiş bir cinayətdir. Bu cinayətlərin qarşılığında isə Ermənistana qarşı sərt tədbirlər görülməlidir. Məscidləri dağıdan dövlət heç vaxt müsəlman ölkələrinin dostu ola bilməz. Müsəlman ölkələrindən də gözləntimiz ondan ibarətdir ki, Ermənistanla əməkdaşlıqdan çəkinsinlər.
Təəssüf ki, Ermənistan bu günə kimi törətmiş olduğu cinayətlərə görə hüquqi müstəvidə cəzalanmayıb. Ona görə də Ermənistan davamlı olaraq tarixi, milli, dini dəyərlər qarşı vandalizm aktları həyata keçirir. Artıq müsəlman ölkələrinin birliyi müstəvisində Ermənistana qarşı sərt reaksiyalar verilməlidir. Milli-mənəvi dəyərlərə qarşı olan bir dövlətin xislətini və xarakterini artıq hər kəs görməlidir”.
Bütün xəbərlər Facebook səhifəmizdə
USD
EUR
GBP
RUB