İyulun 20-də Milli Məclisin sədri Oqtay Əsədov Avropa Şurası Parlament Assambleyası (AŞPA) Avropa Xalq Partiyasının (AXP) üzvləri ilə görüşüb.
SİA-nın xəbərinə görə, AXP-nin təmsilçilərinin Azərbaycana səfərini yüksək dəyərləndirən Oqtay Əsədov bunun Milli Məclislə AŞPA arasında əməkdaşlığın daha da dərinləşməsinə xidmət etdiyini bildirib.
O.Əsədov deyib ki, Azərbaycan Avropa strukturları ilə əlaqələrin inkişafına xüsusi önəm verir. Avropa təsisatları ilə əlaqələrin inkişafı Azərbaycanın xarici siyasətində prioritet istiqamətlərdəndir. Bu kontekstdə ölkəmiz Avropa Şurası ilə münasibətlərinin daha da dərinləşməsində maraqlıdır. 10 ildən artıqdır ki, Azərbaycan Avropa Şurasının üzvüdür. Bu illər ərzində ölkəmizin demokratik inkişafında, qanunvericiliyin Avropa standartlarına çatdırılmasında Avropa Şurası vacib rol oynayıb.
Milli Məclisin sədri hakim Yeni Azərbaycan Partiyası (YAP) ilə Avropa Xalq Partiyası arasındakı əlaqələri yüksək qiymətləndirib. Bildirib ki, biz YAP-ın müşahidəçi qismində AXP-də təmsil olunmasını istəyirik.
Respublikamızın dinamik inkişafından söz açan Oqtay Əsədov qeyd edib ki, sosial-iqtisadi sahədə Azərbaycan dünyanın ən sürətlə inkişaf edən ölkələri sırasında yer alıb. Hətta 2009-cu ildə özünün zirvə nöqtəsinə çatan qlobal maliyyə böhranı zamanı Azərbaycanda ümumi daxili məhsul istehsalı 9,3 faiz artıb. Bu kontekstdə qarşıya qoyulan əsas məqsəd, demokratik cəhətdən mükəmməl inkişaf etmiş dövlət yaradılmasıdır.
Milli Məclisin sədri Ermənistan-Azərbaycan, Dağlıq Qarabağ münaqişəsinə də toxunaraq deyib ki, bu təkcə ölkəmizin deyil, Avropanın da təhlükəsizliyinə təhdiddir. Ermənistan 20 ildən artıq davam edən münaqişənin dinc yolla həlli üçün BMT Təhlükəsizlik Şurasının, Avropa İttifaqının, Avropa Şurasının qərar və qətnamələrini hələ də yerinə yetirmir. Təcavüzkar Ermənistan bu qətnamələrə məhəl qoymur. Bununla beynəlxalq hüquqa, həmin qətnamələri qəbul edən təşkilatlara hörmətsiz yanaşdığını göstərir.
AŞPA-nın yay sessiyasında Ermənistan tərəfinin qurumun Dağlıq Qarabağ münaqişəsi üzrə Alt komitəsinin iclasında iştirakdan imtina etməsi Avropa Şurasına qarşı hörmətsizliyin bariz nümunəsidir.
Görüş üçün təşəkkürünü bildirən AXP sədri Luca Volonte AŞPA-nın demokratiya üçün böyük zəmin olduğunu qeyd edib. O, YAP-ın AXP-də müşahidəçi qismində təmsil olunacağına əminliyini söyləyərək bunun AXP-nin beynəlxalq əlaqələrinin inkişafına töhfə olacağını diqqətə çatdırıb.
Qonaq Azərbaycanda demokratiyanın inkişafı, qanunların təkmilləşdirilməsi istiqamətində görülən işlər və dini tolerantlıq məsələləri ilə maraqlanıb.
Oqtay Əsədov qonaqları maraqlandıran sualları cavablandırmış, Azərbaycanın Avropa Şurası qarşısında götürdüyü öhdəliklərin böyük əksəriyyətini yerinə yetirdiyini, demokratik inkişaf istiqamətində səylərin davam etdirildiyini bildirmiş, ölkəmizdə dini tolerantlığın çox yüksək səviyyədə olduğunu qeyd edib.
Bütün xəbərlər Facebook səhifəmizdə
USD
EUR
GBP
RUB