“Ceyhun Bayramov və Oana-Silvia Toiu arasında telefon danışığı, formal diplomatik hadisə kimi görünsə də, əslində iki ölkə arasında münasibətlərin daha geniş regional və strateji kontekstini əks etdirən bir siqnaldır”.
Bu sözləri SİA-ya açıqlamasında politoloq Rəşad Bayramov bildirib.
Onun sözlərinə görə, belə təmaslar adətən yalnız gündəlik protokol ünsiyyəti deyil, həm də qarşılıqlı maraqların uzlaşdırılması və uzunmüddətli əməkdaşlıq xəttinin saxlanılması məqsədi daşıyır:
”İlk növbədə, Azərbaycan və Rumıniya arasında münasibətlərin mahiyyətini anlamaq üçün onların geosiyasi mövqeyinə baxmaq lazımdır. Azərbaycan Cənubi Qafqaz və Xəzər hövzəsində enerji resursları ilə strateji əhəmiyyət daşıyır, Rumıniya isə Avropa İttifaqı daxilində Qara dəniz regionunun mühüm aktorlarından biridir. Bu iki ölkə arasında əlaqələr əsasən enerji, nəqliyyat və Avropa–Qafqaz körpüsü funksiyası üzərində formalaşır.
Telefon danışığının ikitərəfli və çoxtərəfli münasibətlərin inkişaf perspektivləri kimi çərçivələnməsi də göstərir ki, söhbət təkcə ikitərəfli gündəlik məsələlərdən yox, həm də daha geniş platformalardan, xüsusilə də Avropa İttifaqı ilə əlaqələr və regional enerji təhlükəsizliyi mexanizmlərindən gedir. Rumıniya bu kontekstdə Azərbaycanın Avropaya enerji təchizatında etibarlı tərəfdaş kimi çıxış etməsində maraqlıdır, Azərbaycan isə Avropa bazarına çıxışın diversifikasiyasını gücləndirməyə çalışır.
Digər mühüm məqam enerji təhlükəsizliyidir. Son illərdə Avropada enerji marşrutlarının şaxələndirilməsi prioritetə çevrilib və bu çərçivədə Azərbaycan Qafqaz–Qara dəniz xətti üzrə strateji təchizatçı rolunu gücləndirib. Rumıniya isə həm istehlakçı, həm də tranzit ölkə kimi bu sistemdə körpü funksiyasını yerinə yetirə bilər. Telefon danışığının məhz bu dövrdə baş tutması enerji əməkdaşlığının davamlılıq mərhələsinə keçdiyini göstərir.
Onu da qeyd edim ki, Rusiya-Ukrayna müharibəsi və ümumilikdə Avropada təhlükəsizlik arxitekturasının dəyişməsi fonunda, Qara dəniz regionu və Cənubi Qafqaz daha sıx strateji əlaqəyə girib. Bu kontekstdə Azərbaycan və Rumıniya kimi ölkələr arasında koordinasiya təkcə iqtisadi deyil, həm də siyasi əhəmiyyət daşıyır.
Odur ki, bu telefon danışığı əslində daha geniş bir prosesin tərkib hissəsidir deyə bilərik. Bu tip təmaslar münasibətlərin strateji xətt üzrə davam etdiyini göstərir”.
Bütün xəbərlər Facebook səhifəmizdə
.jpg)
USD
EUR
GBP
RUB
