“Azərbaycanın Mərkəzi Asiya ölkələrinin Məşvərət görüşünə üzv qəbul edilməsi region siyasətində strateji dönüş nöqtəsi hesab oluna bilər. Bu addım Bakı üçün yalnız formal diplomatik status demək deyil, həm də Mərkəzi Asiya ilə ikitərəfli və çoxtərəfli münasibətlərin dərinləşdirilməsi üçün geniş imkanlar deməkdir. Artıq Azərbaycan bundan sonra bu platforma çərçivəsində keçirilən bütün görüşlərdə, o cümlədən dövlət və hökumət başçılarının, nazirliklərin, dövlət və ictimai təşkilatların səviyyəsində iştirak edə biləcək. Bu, həm siyasi nüfuzun, həm də regional diplomatik əlaqələrin güclənməsi baxımından önəmlidir”. Bu sözləri SİA-ya açıqlamasında politoloq Rəşad Bayramov deyib.
O bildirib ki, Mərkəzi Asiya ölkələri geosiyasi baxımdan çox strateji regionda yerləşirlər: “Azərbaycan bu platforma vasitəsilə həm Rusiya, həm Çin, həm də Qərb arasında tarazlığı qorumağa çalışaraq, regional siyasətdə müstəqil mövqe nümayiş etdirir. Diplomatik platformada birbaşa təmaslar, görüşlər və müzakirələr Azərbaycanın Mərkəzi Asiya ölkələrinə həm siyasi dəstək verməsinə, həm də öz mövqeyini daha effektiv şəkildə ifadə etməsinə imkan yaradır.
İqtisadi və ticarət baxımından bu addım Azərbaycanın imkanlarını genişləndirir. Mərkəzi Asiya bazarları yeni ticarət və investisiya layihələri üçün açılır, xüsusilə enerji, nəqliyyat və infrastruktur sahələrində əməkdaşlıq potensialı artır. Bakı həmçinin “Şimal-Cənub” və “Şərq-Qərb” nəqliyyat dəhlizlərində daha aktiv iştirak edərək tranzit imkanlarını gücləndirir. SOCAR və digər enerji şirkətləri üçün bu əməkdaşlıq regionda yeni layihələrə çıxış deməkdir, qaz, neft və elektrik enerjisi sahəsində tərəfdaşlıq imkanlarını genişləndirir.
Təhlükəsizlik və strateji əməkdaşlıq baxımından da Mərkəzi Asiya platforması Azərbaycan üçün vacib rol oynayır. Terrorizm, kiber təhlükəsizlik və sərhəd məsələlərində məlumat mübadiləsi imkanları artacaq. Həmçinin transregional problemlərin həlli – enerji siyasəti, regional münaqişələr və sərhəd təhlükəsizliyi məsələlərində koordinasiyalı yanaşmalar daha asan olacaq.
Nəticədə, Azərbaycanın Mərkəzi Asiya Məşvərət görüşünə üzvlüyü regional nüfuzun artırılması ilə yanaşı, diplomatik və iqtisadi imkanlarımızı da genişləndirir, təhlükəsizlik və humanitar əməkdaşlığı möhkəmləndirir. Dövlət, hökumət və digər qurumların bu platformada iştirakı isə təbii olaraq Azərbaycanın Mərkəzi Asiya ilə inteqrasiyasının dərinləşməsinə və regional təsir gücünün daha da artırılmasına xidmət edəcək. Bu addım strateji baxımdan ölkənin Cənubi Qafqazdan Mərkəzi Asiyaya qədər genişlənən geosiyasi mövqeyini möhkəmləndirir və gələcəkdə regionda daha fəal və effektiv oyunçu rolunu təmin edir.
Bütün xəbərlər Facebook səhifəmizdə
USD
EUR
GBP
RUB
