Azərbaycan Avropa İttifaqının qaz tədarükündə öhdəlik götürməyə razıdır. Bu sözləri Azərbaycan Dövlət Neft Şirkətinin (ARDNŞ) vitse-prezidenti Elşad Nəsirov CNN telekanalına müsahibəsində deyib.
"Cənub" Qaz Dəhlizi layihəsinə toxunan vitse-prezident bildirib ki, Azərbaycan tərəfi son investisiya qərarlarını 2013-cü ildə yekunlaşdırıb. Boru kəməri tikintisinin və Xəzər dənizindən təbii qaz hasilatının ümumi xərci 45 milyard ABŞ dolları təşkil edəcək. Tikintisi beş ilə başa çatacaq kəmərin uzunluğu 3500 kilometr olacaq.
Diqqətə çatdırılıb ki, layihəyə bir sıra ölkələrdən 12 şirkət daxil olacaq. 2019-cu ilə qədər 6 milyard kubmetr əlavə qaz Türkiyəyə, 10 milyard kubmetr qaz Yunanıstan, Albaniya, Bolqarıstan, və İtaliyaya çatdırılacaq.
Avropaya qaz ixracında Rusiya ilə rəqabət məsələləri ilə bağlı sualı cavablandıran Elşad Nəsirov deyib: "Hazırda biz özümüzü Rusiya qazına güclü rəqib hesab etmirik. Çünki indi istehsal etdiyimiz qazın həcmi Rusiya ilə eyni səviyyədə deyildir. Eyni zamanda, hesab edirik ki, bizim Avropaya əlavə və ya alternativ qaz tədarükümüz Avropa İttifaqının qaz təchizatının şaxələndirilməsi istiqamətində bir addımdır. Azərbaycanın qaz istehsalı heç kimə qarşı yönəlməmişdir".
E.Nəsirov deyib: "Cənub" Qaz Dəhlizinin reallaşdırılması üçün 10 ildən çoxdur danışıqlar aparırıq. Biz Avropa İttifaqı ilə yanaşı, Gürcüstan, Rusiya, Türkiyə kimi qonşu ölkələri də qazla təchiz etməyə hazırıq".
Layihənin gəlirliliyi barədə danışan ARDNŞ-in vitse-prezidenti Azərbaycanda qaz istehsal edən, xüsusilə də "Şahdəniz-2" layihəsində iştirak edən şirkətlərin kifayət qədər ciddi və önəmli qurumlar olduğunu, investisiyalarını, gəlirlərini, nəqliyyat tariflərini dəqiqliklə hesabladıqlarını diqqətə çatdırıb. Vitse-prezident bildirib ki, əlbəttə, bu, çox ciddi layihədir və istənilən halda uzun müddətdə Azərbaycanda fəaliyyət göstərən qaz istehsalçılarına əlavə və əhəmiyyətli gəlir gətirəcək.
Sonda E.Nəsirov bildirib ki, ixrac olunan qazın qiyməti danışıqlarla deyil, dünya bazarındakı tariflərə uyğun müəyyən ediləcək.
Bütün xəbərlər Facebook səhifəmizdə
USD
EUR
GBP
RUB