Birləşmiş Millətlər Təşkilatının Uşaq Fondunun (UNICEF) sözçüsü Ceyms Elder Qəzzadakı müharibənin uşaqlara qarşı aparıldığını bildirib.
SİA-nın xarici qaynaqlardan əldə etdiyi məlumata görə, bu barədə Ceyms Elder rəsmi ''X'' internet səhifəsində etdiyi paylaşımda bildirib.
Qəzzada humanitar fasilənin başa çatmasından sonra və İsrailin hücumlara yenidən başlamasından sonra xəstəxanaların birindən video paylaşan Ceyms Elder Qəzzada fəaliyyət göstərən ən böyük xəstəxanadan 50 metr aralıda yerləşən ərazinin vurulduğunu və xəstəxananın çox sayda yaralıya tibbi xidmət göstərdiyini bildirib.
Bu xəstəxananın müharibə nəticəsində yaralanan daha çox uşağı qəbul edə bilməyəcəyini, hər yerdə uşaqların olduğunu bildirən Ceyms Elder deyib: "Son 7 həftədə xəstəxanaların tutumunun necə azaldığını izah edə bilmərəm. Yaşananlar daha çox uşaqların ölməsinə səbəb olur. Bu, uşaqlara qarşı müharibədir”.
Xatırladaq ki, ''Həmas''ın silahlı qanadı İzzəddin əl-Qəssam Briqadaları İsrailin fələstinlilərə və onların müqəddəs dəyərlərinə qarşı davamlı pozuntularına cavab olaraq oktyabrın 7-də səhər saatlarında hərtərəfli hücuma keçib. İsrail qüvvələri də buna cavab olaraq Qəzza zolağına intensiv hücumlara başlayıb.
İsrail oktyabrın 7-dən bu yana 310-dan çoxu əsgər olmaqla 1200-dən çox israillinin öldüyünü, 5132 nəfərin yaralandığını açıqlayıb. Qəzza zolağında baş verən qarşıdurmalarda 70 İsrail əsgəri də həlak olub.
Qəzzadakı hökumətin məlumatına görə, İsrailin oktyabrın 7-dən bu yana həyata keçirdiyi hücumlarda Qəzza zolağında 6150-dən çoxu uşaq və 4000-dən çoxu qadın olmaqla 15000-dən çox adam həlak olub.
Oktyabrın 7-dən bəri işğal altındakı İordan çayının qərb sahili və Qüdsdə İsrail qüvvələrinin və yəhudilərin hücumları nəticəsində 248 fələstinli həyatını itirib.
İsrail ordusu Qəzzada on minlərlə yaralı və mülki vətəndaşın sığındığı onlarla xəstəxananın şəhərciklərinə və əsas binalarına zərbələr endirib. İşğal zamanı bəzi xəstəxanalara basqın edib. Hücumlarda yüzlərlə insan ölüb, yaralanıb.
Oktyabrın 8-dən İsrail ordusu ilə Hizbullah arasında sərhəddə baş verən qarşıdurmalarda 86 Hizbullah üzvü ölüb.
Bütün xəbərlər Facebook səhifəmizdə
USD
EUR
GBP
RUB