“Sovet İttifaqından ayrıldıqdan sonra Azərbaycan bir sıra çətinliklərlə üzləşdi. İqtisadiyyatın və sosial sahələrin inkişafı üçün ciddi islahatlar və dəyişikliklər aparıldı. Bu dövrdə təhsil, səhiyyə, idarəetmə və iqtisadiyyatda çoxsaylı yeniliklər baş verdi. Lakin, xüsusilə naşı idarəçilərin hakimiyyətə gəlməsi ölkənin inkişafını müəyyən qədər ləngitdi. Ulu öndər Heydər Əliyevin hakimiyyətə gəlişi ilə ölkədə iqtisadiyyatın inkişafı üçün ciddi tədbirlər həyata keçirilməyə başlandı. Əsrin müqaviləsi ilə Azərbaycan neftinin Avropaya ixracına başlanıldı, bu da iqtisadiyyatın mühüm həlqələrindən birini təşkil etdi”. Bu sözləri SİA-ya açıqlamasında sosial məsələlər üzrə ekspert Ramal Əliyev deyib.
Ramal Əliyev sözlərinə belə davam edib: “30 il ərzində Azərbaycan iqtisadiyyatı əhəmiyyətli dərəcədə inkişaf etdi. Ölkə müxtəlif sahələrdə, xüsusilə də idman və mədəniyyət sahələrində, həm regionda, həm də Avropada ön sıralarda yer aldı. Azərbaycan, həmçinin, beynəlxalq səviyyədə bir çox mötəbər tədbirlərə ev sahibliyi etdi. Lakin Azərbaycanın ən böyük uğuru 44 günlük Vətən müharibəsində qazandığı şanlı qələbə oldu. Bu qələbə sayəsində Azərbaycan, işğal altında olan torpaqlarını düşməndən azad edərək, öz suverenliyini bərpa etdi.
Vətən müharibəsi və onun hazırlıq dövrü ölkəyə böyük maliyyə və resurs tələb etdi. Hərbi infrastrukturun qurulması, silah alınması və müharibə xərcləri iqtisadiyyatda digər sahələrin inkişafını müəyyən qədər ləngitdi. Bu dövrün əsas problemlərindən biri, xüsusilə bölgələrdə fabriklərin və zavodların olmaması ilə bağlı idi. Nəticə olaraq, bölgələrdə yaşayan insanlar daha yaxşı iş imkanları tapmaq məqsədilə paytaxt Bakıya axın etməyə başladılar. Bakıda iş tapmaq rayondan daha asan olduğu üçün, bu, şəhərdə çox böyük bir əhali sıxlığına və nəqliyyat problemlərinə səbəb oldu.
Bu çətinliklərdən çıxış yolu, qeyri-neft sektorunun inkişafı və bölgələrdə sənaye müəssisələrinin, xüsusilə də zavod və fabriklərin yaradılmasıdır. Beləliklə, bölgələrdə iş yerlərinin sayının artması, əhalinin həyat səviyyəsinin yaxşılaşması və kənd təsərrüfatının inkişafı təmin oluna bilər. Hazırda Azərbaycan hökumətinin əsas diqqəti Qarabağ regionunun bərpasına yönəlmişdir. Bu, ölkənin gələcək inkişafı üçün mühüm bir mərhələdir və Qarabağın iqtisadi inkişafı ilə bağlı çoxsaylı planlar mövcuddur.
Qarabağ bölgəsinin bərpası yalnız ərazinin infrastrukturunun bərpasını deyil, eyni zamanda, yeni sənaye sahələrinin yaradılmasını da əhatə edir. Bu, bölgələrdə iqtisadiyyatın inkişafına təkan verəcək və Bakıya olan insan axınını azaldacaqdır. Bölgələrin inkişafı nəticəsində yerli əhali öz doğma yurdlarında iş tapacaq, bununla da paytaxtın həddindən artıq sıxlığının qarşısı alınacaqdır.
Nəticə etibarilə, Azərbaycanın gələcək inkişafı üçün regionların iqtisadiyyatının diversifikasiyası və sənayenin inkişafı mühüm əhəmiyyət kəsb edir. Qarabağın bərpası, ölkənin digər bölgələrində də iqtisadiyyatı canlandıracaq və əhalinin həyat səviyyəsini yüksəldəcək. Bu, həmçinin, Azərbaycana öz daxili resurslarını daha səmərəli istifadə etməyə imkan verəcək, ölkə daxilində iş gücünün paylanmasını tarazlayacaq və əhalinin həyat şəraitini yaxşılaşdıracaqdır. Gələcəkdə, bu tədbirlər sayəsində Bakı şəhərinə olan əhali axınının azalması və digər bölgələrin inkişafı mümkün olacaqdır”.
Ayşən Vəli
Bütün xəbərlər Facebook səhifəmizdə
USD
EUR
GBP
RUB