Diplom tanınır, ixtisas tanınmır? - ŞİKAYƏT

Nərmin Adıgözəlzadənin 28 yaşı var. İki ildir ki, Azərbaycana köçüb. Sanki-Peterburqda SZGMU Mecnikova Universitetində Oftalmologiya ixtisası üzrə təhsil alıb. Azərbaycanda öz ixtisası üzrə işləmək istəsə də, iş tapa bilmir. Diplomunu təsdiq edən sənədi alsa da, ixtisasının tanınmadığını deyib, işə qəbul etmirlər. Hal-hazırda Spera Hospitalda həkim köməkçisi kimi fəaliyyət göstərsə də, Nərmin Adıgözəlzadə ixtisası üzrə işləmək istəyir. SİA şikayətlə bağlı Səhiyyə Nazirliyinin Media və kommunikasiya şöbəsinə, Təhsildə Keyfiyyət Təminatı Agentliyinə və təhsil eksperti Elşən Qafarova mövzu ilə bağlı sorğu ünvanlayıb.

Səhiyyə Nazirliyinin Media və kommunikasiya şöbəsi: "Xaricdə təhsil alan Nərmin Adıgözəlovzadənin baza təhsili ölkəmizdə tanınıb. 2011-ci ildən sonra xarici ölkədə aldıqları ali ixtisas tibb təhsili əsasında Azərbaycan Respublikasında praktik tibb fəaliyyətinə buraxılmaq üçün müraciət edən şəxslərin aldıqları ali ixtisas tibb təhsili ilə uyğun ixtisas üzrə Azərbaycan Respublikasındakı rezidentura təhsilinin müddəti və proqramları arasında uyğunsuzluq olduğu halda həmin şəxslər rezidenturaya qəbul olmalıdırlar.

Bununla yanaşı, əsas (baza ali) tibb təhsilini müalicə işi (tibb) ixtisası üzrə bitirən şəxslər həkim-metodist, həkim-statistik, təcili və təxirəsalınmaz tibbi yardım üzrə həkim vəzifələrində fəaliyyət göstərə bilərlər".

Təhsildə Keyfiyyət Təminatı Agentliyinin mətbuat şöbəsi: "Fevral ayı üzrə 613 müraciətçinin 548-i barədə müsbət qərar verilərək müvafiq şəhadətnamələr təqdim edilmiş, 65 nəfərin müraciəti isə mənfi qərarla yekunlaşmışdır.

Tədris yükünü mənimsəmək üçün təhsil aldığı ölkənin ərazisində tələb olunan normativdən az olması səbəbi ilə 47, "Açıköğretim" təhsil forması səbəbilə 6, akkreditasiyasız ali təhsil müəssisəsi səbəbilə 4, tədris yükünü mənimsəmək üçün təhsil aldığı ölkənin ərazisində tələb olunan normativdən az olması və əhəmiyyətli fərq səbəbi ilə 3, baytarlıq ixtisası üzrə qiyabi formada təhsil alınması səbəbilə 2, ekvivalenti olmayan ixtisas səbəbilə 2, bakalavr diplomu üzrə imtina verilmə səbəbilə 1 nəfərin müraciəti mənfi qərarla yekunlaşmışdır.

Ölkələr üzrə müraciətlərin sayına nəzər saldıqda Rusiya Federasiyasından 166, Ukraynadan 158, Türkiyə Respublikasından 148, Belarus Respublikasından 43, Gürcüstandan 21, Birləşmiş Krallıqdan 18, Macarıstan dan 12, Amerika Birləşmiş Ştatlarından 6, Polşa Respublikasından 6, Qırğız Respublikasından 4, İsveç Krallığından 3, Niderland Krallığından 3, Pakistan İslam Respublikasından 3, İspaniya Krallığından 2, İtaliya Respublikasından 2, Malayziyadan 2, Mərakeş Krallığından 2, Tacikistan Respublikasından 2, Almaniya Federativ Respublikasından 1, Belçika Krallığından 1, Cənubi Afrika Respublikasından 1, Çin Xalq Respublikasından 1, Fransa Respublikasından 1, İsveçrə Konfederasiyasından 1, Kanadadan 1, Koreya Respublikasından 1, Latviya Respublikasından 1, Nigeriya Federativ Respublikasından 1, Özbəkistan Respublikasından 1, Qazaxıstan Respublikasından 1müraciətin olduğu müşahidə olunur.

Ən çox müraciət olunan ixtisaslara gəlincə, hüquqşünaslıq ixtisası üzrə 128, tibb ixtisası üzrə 52, yanğın təhlükəsizliyi mühəndisliyi ixtisas üzrə 43, həyat fəaliyyətinin təhlükəsizliyi mühəndisliyi ixtisası üzrə 39, stomatologiya ixtisası 27 müraciət qeydə alınmışdır".

Təhsil eksperti Elşən Qafarov: "Əvvəl xaricdə verilmiş kvalifikasiyaların tanınması qaydaları var ki, cənab Prezident tərəfindən 2023-cü ildə təsdiq olunub. Xaricdə verilmiş ali təhsil kvalifikasiyalarından söhbət gedir. İstər bakalavr, istər magistratura, istər doktorantura, yaxud tibb sahəsilə bağlı xaricdə təhsil alanların kvalifikasiyaları, dərəcələri, ixtisasları tanınmalıdır. Diplom həmin ixtisas üzrə bunu təsdiq edən sənəddir. Diplom təsdiq olinsuz, ixtisas təsdiq olunmasın, bu hala ikinci dəfədir ki, rast gəlinir. Bu yaxınlarda bir nəfər də belə bir müraciət etmişdi. Diplom ixtisası təsdiq edən sənəddir. Mən açıq danışım, son vaxtlar gündən-günə artmaqdadır bu tendensiya. Təhsil Nazirliyində nə desəniz baş verir. İzahı olmayan, absurd olan maraqlı haldır. Niyə axı? Bu sual məni də düşündürür. Əvvəlki qaydalardan qat-qat müasir, beynəlxalq standartlara cavab verən qaydalar təsdiq olunub. Təhsil Nazirliyində hamı bir-birinə söz verib ki, nə olursa-olsun xalqı incitsinlər, sanki belə bir öhdəlik götürüblər. Qanunların tətbiqini elə eybəcər şəkildə aparırlar ki, sanki bunların missiyası var ki, hər addımda xalqda dövlətə, hökumətə qarşı narazılıq yaratsınlar. Dediyiniz məsələ də buna aiddir. Yəni bunu kimdən soruşaq? Diplom tanınır, ixtisas tanınmır. Mən təəssüf edirəm və düşünürəm ki, Elm və Təhsil Nazirliyində ciddi dəyişikliklər aparmaq lazımdır. Başda Emin Əmrullayev olmaqla onun təyin etdiyi kadrlar da çox ciddi problemlər yaradırlar. Süni maneələr yaradırlar. Yəqin ki, müvafiq dövlət orqanları buna nəzarət edirlər. Yəqin ki, müvafiq dövlət orqanları buna nəzarət edirlər. Düşünürəm ki, Emin Əmrullayevin və onun təyin etdiyi kadrların xalqı bilərəkdən incitməsi, sosial narazılıq yaratması, yəqin ki, bir gün izah olunacaq. Bununla bağlı, yəqin ki, bir gün cavab verəcəklər. Belə hallar birmənalı şəkildə qınanmalıdır".