"Fransanın “Opinion Way” şirkəti tərəfindən aparılan sorğunun nəticələri Azərbaycan reallığının göstəricisidir. Sorğu bir daha təsdiqlədi ki, Azərbaycan vətəndaşı, seçicilər Prezident İlham Əliyevin yanındadır və ölkə başçısına etimad yüksək səviyyədədir”. Bu fikirləri SİA-ya açıqlamasında “Səs” qəzetinin baş redaktoru, siyasi ekspert Bəhruz Quliyev deyib.
Siyasi ekspert bildirib ki, təkcə Azərbaycanda deyil, eləcə də bütün dünyada Liderin reytinqinin yüksək olmasını şərtləndirən əsas amil onun xalqla birliyidir.
Ötən il keçirilən prezident seçkilərinin yeni institusional islahatlar üçün impuls olduğunu dilə gətirən siyasi ekspert söyləyib ki, bu müddət ərzində dövlət başçısı tərəfindən xalqın əmin-amanlığı və rifahı naminə bütün zəruri addımlar atılıb, əhalinin firavan həyatı üçün ardıcıl tədbirlər görülüb, Prezident xüsusilə də vətəndaşlarla birbaşa təmasa girərək, onların problemlərini öz dillərindən eşidib: “Ekspertlər də bildirirlər ki, əgər hər bir vətəndaşın Prezidenti ilə xəyalı söhbəti reallaşırsa, bu, həmin ölkədə Liderlə vətəndaş arasında istəyin, hörmətin göstəricisinə çevrilir. Bu baxımdan görülən işləri, atılan addımları ölkədaxili vəziyyəti və Azərbaycan Prezidentinin fəaliyyətini yüksək qiymətləndirməyi təmin edən amillər hesab etmək mümkündür”.
B.Quliyev qeyd edib ki, ölkə başçısının 15 illik fəaliyyətinin məntiqi nəticəsi olan, son 1 il müddətində davam etdirilən siyasət sayəsində Azərbaycanda sosial, iqtisadi, mədəni inkişafla yanaşı, sabitlik, təhlükəsizlik də tam təmin olunub: “Prezident İlham Əliyev tərəfindən 15 ildə həyata keçirilən siyasət son 1 ildə daha fərqli şəkildə diqqəti cəlb edir. Bildiyiniz kimi, bu gün Azərbaycan həm sosial, həm siyasi, həm də iqtisadi sahədə dünyaya inkişafın yeni modelini nümayiş etdirir. Son 1 ildə Azərbaycan Prezidenti bütün bunlarla yanaşı, liderin vətəndaşlara olan münasibətinin də yeni modelini ortaya qoymuş oldu. Belə ki, dövlət başçısının müxtəlif görüşlərdə, tədbirlər çərçivəsində, baş verən hadisələr zamanı vətəndaşların yanında olması, onların problemlərinin həllinə operativ şəkildə reaksiya verməsi, problemləri onların öz dillərindən öyrənməsi artıq bütün dünya üçün yeni model, təcrübədir”.
Baş redaktor vurğulayıb ki, “Opinion Way” kimi müstəqil bir şirkət tərəfindən həyata keçirilən sorğuda respondentlərə təqdim olunan bütün suallara verilən cavablarda dövlət başçısına göstərilən yüksək etimad bir daha sübut edir ki, Azərbaycan vətəndaşı ölkə rəhbərini, həyata keçirilən siyasəti dəstəkləyir: “Məhz elə bunun nəticəsidir ki, “Prezident İlham Əliyevin son bir ildə gördüyü işləri necə qiymətləndirirsiniz?” sualına respondentlərin 85,1 faizi, “Prezident İlham Əliyevin son ildə apardığı islahatları necə qiymətləndirirsiniz?” sualına 90,5 faizi, seçkiqabağı vədlərinin yerinə yetirilməsinin qiymətləndirilməsinə dair suala 75,6 faizi, kadr islahatları ilə bağlı suala 78,8 faiz müsbət cavab verilib. Bununla yanaşı, “Regionların sosial-iqtisadi inkişaf proqramı” və hökumətin bölgələrdə həyata keçirdiyi fəaliyyət nəticəsində sizcə regionlar inkişaf edibmi?” sualına respondentlərin 93,1 faizi “hə” cavabı verib, 72,3 faizi hökumətin bu istiqamətdəki fəaliyyətini tam müsbət, 20,8 faizi “əsasən müsbət” kimi dəyərləndirib. Prezidentin bölgələrə çoxsaylı səfərlərinin faydalılıq əmsalı respondentlərin 90,4 faizi tərəfindən müsbət dəyərləndirilib, 48,9 faiz bu səfərləri “çox yüksək”, 27,5 faiz “əsasən yüksək”, 14 faiz isə “qismən yüksək” kimi qiymətləndirib. Sorğunun Prezident İlham Əliyevin xarici siyasəti ilə bağlı nəticələri də əhalinin müsbət mövqeyini ifadə edib. Ümumilikdə götürsək, sorğuda iştirak edənlərin 89,9 faizi bu sualı müsbət cavablandırıb, onların 73,9 faizi suala “əla” kimi münasibət bildirib. Ümumilikdə sorğu Azərbaycanda həyata keçirilən siyasətin düzgün olduğunu, xalq-lider birliyini bir daha təsdiq etmiş olur”.
Bütün xəbərlər Facebook səhifəmizdə
USD
EUR
GBP
RUB