Eks-cəbhəçi, "Azadlıq" qəzetinin keçmiş yazarı Mirzə Sakit növbəti dəfə AXCP sədri Əli Kərimlini və "Azadlıq" qəzetini ittiham edən çıxış edib. SİA-nın məlumatına görə, "Yeni Müsavat"a müsahibəsində kəskin ittihamlarla çıxış edən satirik yazar vaxtilə çalışdığı mətbu orqanda qarşılaşdığı haqsızlıqlardan söz açıb və hazırda AXCP-nin mətbuat xidmətinin cəmiyyətə yalan informasiyalar sırıdığını iddia edib: "Partiyanın mətbuat xidmətinin rəhbəri cəmiyyətə yalan informasiya sırıyır. Bu da onun təmsil olunduğu partiyanın qeyri-ciddiliyindən xəbər verir. "Azadlıq" qəzetindən "donos" yazmamışam. Natiq Güləhmədoğlu (Ədilov) bəhanə edib saman çöpündən yapışmasın. Haqsızlığa qarşı səsini çıxaran adamı "donos yazan" adlandırmaq, elə Natiq və onun sədri kimi adamların ağlına uyğun gəlir".
Mirzə Sakit "Azadlıq" qəzetindən uzaqlaşdırılmasının səbəbinə də aydınlıq gətirərək bildirib ki, onun qəzetin texniki direktoru Azər Əhmədovla münaqişəsi olub: "Çünki Azər Əhmədov yazılarımı dərc etmirdi. Bu haqda dəfələrlə Əli Kərimliyə müraciət etmişdim. Ancaq Əli Kərimli gözümün içinə yalanlar danışırdı".
Satirik yazar AXCP mətbuat xidmətinin rəhbəri Natiq Ədilovun onun qardaşı Qənimət Zahid tərəfindən işdən uzaqlaşdırılması iddialarına da münasibətini açıqlayarkən qeyd edib ki, qarşı tərəf yalan danışıb: "Natiq deyir məni qardaşım işdən azad edib. "Azadlıq" qəzetindən qeyri-qanuni uzaqlaşdırılan zaman Qənimət Zahid həbsdə olub. Həbsdə olan adamın sərəncam imzalaması qanunsuz sayılır. Yox, əgər "Azadlıq" qəzeti "Vor v zakone" qanunları ilə fəaliyyət göstərirsə, bu başqa məsələ. Ancaq hamı bilir ki, bu qəzet birbaşa Əli Kərimliyə tabedir və qəzetin vergüllərinin hansı dərəcədə əyilməsini də o təyin edir. Hazırda qəzetin bütün rəhbər komandası cəbhəçilərdən ibarətdir".
Xatırladaq ki, Natiq Ədilov iddia edib ki, Mirzə Sakiti qardaşı Qənimət Zahidov "Azadlıq" qəzetindən qovub: "Mən Mirzə Sakiti ciddiyə almıram. O "Azadlıq" qəzetindən "donos" yazdığına görə doğma qardaşı Qənimət Zahidin əmri ilə işdən çıxarılıb. İşdən də çıxıb Avropaya qaçıb. Məncə, o, həyatını xoş məcrada davam etdirsin, yersiz, mənasız söz atmaların tərgitsin. Yazı-pozu ilə məşğul olub, Avropada kitab çıxarsın. Mən ona Nobel mükafatı almaq arzulayıram".
USD
EUR
GBP
RUB
