Belarusda Azərbaycanın dövlət müstəqilliyinin bərpasının iyirminci ildönümünə həsr olunmuş fotosərgi açılıb
Azərbaycanın Belarusdakı səfirliyi Bobruysk şəhərində respublikamızın müstəqilliyinin bərpasından ötən 20 il ərzində əldə olunmuş nailiyyətləri əks etdirən fotosərgi təşkil edib. SİA-nın məlumatına görə, respublikamızın dövlət müstəqilliyinin bərpasının iyirminci ildönümü ilə əlaqədar səfirliyin tədbirlər planına uyğun olaraq təşkil edilmiş sərginin açılışında səfir İsfəndiyar Vahabzadə, səfirliyin əməkdaşları, Azərbaycan diasporunun üzvləri, yerli dövlət qurumlarının, ictimaiyyətin nümayəndələri və KİV-lərin təmsilçiləri iştirak ediblər.
Bobruysk şəhər sərgi mərkəzindəki tədbirdə səfir İ.Vahabzadə Prezident İlham Əliyevin müstəqilliyimizin bərpasının iyirminci ildönümünün geniş şəkildə qeyd edilməsi ilə bağlı Sərəncam imzaladığını və tədbirlər planına uyğun olaraq həm Azərbaycanda, həm də ölkəmizin hüdudlarından kənarda bu məqsədlə tədbirlərin təşkil edildiyini bildirib. Diplomat ölkəmizdə gedən davamlı inkişaf barədə ətraflı məlumat verib, Bobruysk şəhərində təşkil olunan sərginin də məhz Azərbaycanın müstəqillik illərində əldə etdiyi nailiyyətləri əks etdirdiyini vurğulayıb. Sərginin keçiriləcəyi müddətdə şəhər sakinlərinin ölkəmizlə qiyabi tanışlıq imkanı əldə edəcəyini bildirən səfir, belə tədbirlərin xalqlarımızın daha da yaxınlaşmasında mühüm rol oynadığını diqqətə çatdırıb.Sonra Bobruysk Şəhər İcraiyyə Komitəsinin sədri D.Bonoxov sərginin keçirilməsi üçün məhz bu şəhərin seçilməsinə görə səfirliyə minnətdarlığını bildirib. O, strateji tərəfdaş hesab etdikləri Azərbaycanın uğurlarına hər bir belarusun sevindiyini, belə tədbirlərin davamlı olaraq həyata keçirilməsinin xalqlarımızın bir-birini daha yaxından tanıması baxımından əhəmiyyətini qeyd edib.
Tədbirdə, həmçinin Azərbaycan İcmaları Konqresinin sədri N.Bağırov və Bobruyskda fəaliyyət göstərən "Vətən" Cəmiyyətinin sədri E.Yusifov çıxış ediblər.
Azərbaycanın çoxəsrlik tarixə malik zəngin mədəniyyətini, müasir müstəqillik dövründə əldə etdiyi nailiyyətlərini, turizm imkanlarını əks etdirən və həzin Azərbaycan musiqisinin sədaları altında davam edən sərgi qonaqlar tərəfindən son dərəcə maraqla qarşılanıb.
On gün davam edəcək sərginin açılış mərasiminin iştirakçılarına milli mətbəximizin ləziz nümunələri təqdim edilib.
Bütün xəbərlər Facebook səhifəmizdə
USD
EUR
GBP
RUB