“1993-cü ildə Kəlbəcərin işğalı ermənilər üçün böyük strateji əhəmiyyəti olan bir hadisə idi. Çünki Kəlbəcərin işğalı ilə ermənilər çox böyük bir cəbhədə, uzun bir ərazidə Azərbaycan sərhədlərini tamamilə öz nəzarətlərinə keçirdilər. Kəlbəcərdən başlamış Araz çayına qədər təxminən 1000 km-ə qədər olan məsafə onların nəzarətinə keçdi və bu Qarabağ üçün açıq qapı rolunu oynamağa başladı”. Bu sözləri SİA-ya açıqlamasında siyasi şərhçi Aydın Quliyev deyib.
Onun sözlərinə görə, Azərbaycanın Kəlbəcəri işğaldan azad etməsi strateji maraqlarımız üçün önəmli bir hadisə idi: “Kəlbəcərin işğaldan azad edilməsi bizim sərhədlərimizin tam şəkildə Azərbaycanın nəzarəti altına keçməsini təmin etdi. Eyni zamanda Kəlbəcərin azadlığı dünyada erməni lobbisinə, erməni diasporuna və Ermənistan dövlətinə çox böyük bir zərbə oldu. Bu gün Kəlbəcərdə həyata keçirilən quruculuq işləri bütün Azərbaycanın sosial-iqtisadi inkişafının tərkib hissəsi kimi baxılmalıdır. Eyni zamanda Kəlbəcərin gözəl təbiəti, turizm imkanları, həmin ərazinin insanlarının zəhmətkeşliyi, həmçinin kənd təsərrüfatı üçün yararlı şəraiti Azərbaycan iqtisadiyyatı üçün çox böyük önəmə malikdir”.
Siyasi şərhçi qeyd edir ki, Azərbaycan dövləti, şəxsən Prezdent İlham Əliyev Kəlbəcərin bərpa olunmasına, oranın əvvəlinkindən də gözəl mənzərəyə qaytarılması üçün əlindən gələni edir: “Bütün Azərbaycanda bilir ki, Kəlbəcər həm ölkəmizin təbiət muzeyidir, həm gözəl guşələrindən biridir, həm də Ermənistanla sərhəddə qala bürclərindən biridir. Əgər Kəlbəcərlə bağlı ermənilər tərəfindən xoşagəlməyən addım atılarsa, bütün Azərbaycanın müdafiəyə qalxmasına səbəb olacaq. Eyni zamanda Kəlbəcərdə bu gün, həm iqtisadi cəhətdən, həm təhlükəsizlik nöqteyi nəzərdən həyata keçirilən işlər oranın müdafiəsi deməkdir. Hətta ən kənar müşahidəçinin qiyməti bundan ibarətdir ki, Kəlbəcər bir daha heç vaxt erməni işğalı altına düşə bilməz. Çünki Kəlbəcərin iqtisadi-sosial bərpası ilə onun hərbi-təhlükəsizlik müdafiəsi paralel gedən bir prosesdir. Kəlbəcərdə Azərbaycanın gördüyü işlərin strateji əhəmiyyəti vardır. Kəlbəcər Azərbaycanın istirahət, turizm, eyni zamanda əlverişli aqrar inkişaf imkanlarına malik olan bir bölgəsidir”.
Bütün xəbərlər Facebook səhifəmizdə
USD
EUR
GBP
RUB