Lənkəranda selin fəsadları aradan qaldırılır

Bir neçə gün öncə cənub bölgəsinə yağan güclü yağışlar nəticəsində Lənkəran rayonunda əhalinin şəxsi təsərrüfatlarına, sosial obyektlərə xeyli ziyan dəyib. Lənkəran şəhər İcra Hakimiyyətindən SİA-nın cənub bürosuna verilən məlumata görə, sel nəticəsində Lənkəranın V. Kərimov, Cavanşir, Vidadi küçələrində, o cümlədən rayonun Sütəmurdov, Yuxarı Nüvədi, Rvo kəndlərindəki onlarla evin həyəti lil qatı ilə örtülüb, əhalinin əmlakına ciddi ziyan dəyib. Mal-qara və ev quşları tələf olub.

Sel sularından ən çox ziyan rayonunun elektrik təsərrüfatına dəyib. Lənkəran Yüksək Gərginlikli Elektrik Şəbəkəsinin direktoru Şamid Əliyevin bildirdiyinə görə, rayonda 4 yüksək gərginlikli elektrik dayağı aşıb, rayonun bütün 10 kilovatlıq elektrik xətləri zədələnib. Bu səbəbdən rayonun yaşayış məntəqələrinə elektrik enerjisinin verilişində fasilələr yaranıb.

Hal-hazırda rayon Fövqəladə Hallar Komissiyası sel nəticəsində rayona dəyən ziyanın miqyasını müəyyənləşdirir. O cümlədən təmir-bərpa briqadaları daşqının fəsadlarını aradan qaldırmaq istiqamətində tədbirlər görür. Lənkəran Gigiyena və Epidemiologiya Mərkəzinin işçiləri sel basmış evlərdə dezinfeksiya işləri aparırlar.

Bütün xəbərlər Facebook səhifəmizdə