"Belə bir tədbirin Bakıda keçirilməsi çox mühüm hadisədir. Tədbirdə dünya siyasətinə dair mühüm məsələlər müzakirə olunacaq. Yüksək səviyyəli siyasətçilərin bu tədbirdə iştirakı və mühüm məsələlərin müzakirəsi unikal imkandır". SİA-nın xəbərinə görə, bu sözləri Azərbaycan Respublikasının Prezidenti İlham Əliyev Diasporla İş üzrə Dövlət Komitəsinin dəstəyi və Nizami Gəncəvi Beynəlxalq Mərkəzinin təşkilatçılığı ilə Bakıda keçirilən III Qlobal Açıq Cəmiyyətlər Forumunun açılışında çıxış edərkən deyib.
Ölkə başçısı söyləyib ki, Nizami Gəncəvi Mərkəzi mühüm təsisata çevrilib: "İnanıram ki, bu Mərkəz gələcəkdə dünyada gərginliyin azaldılması, əməkdaşlıq və münbit şərait yaradılması üçün öz töhfəsini verəcək. Bu Mərkəz sosial, humanitar, siyasi məsələlərə dair məqamları müzakirə edir. Azərbaycan əsrlər boyu sivilizasiyaların qovuşduğu məkan olub. Azərbaycan Avropa və Asiya arasında təbii-coğrafi körpüdür, indi isə Avropa və Asiya arasında mədəni bir körpüyə çevrilib. Azərbaycanda müxtəlif etnik və dini nümayəndələr tolerant şəraitdə yaşayıb və ölkəmiz beynəlxalq multikulturalizm mərkəzinə çevrilib. Gələn ay da bununla bağlı mühüm tədbir keçirəcəyik. Azərbaycan 20 ildir ki, müstəqildir və bu müddət ərzində böyük nailiyyətlər əldə olunub. Müstəqillik dövründə göstərdik ki, xalqımız öz gələcəyini özü qura, dünyada öz mövqeyini ortaya qoya bilər. Təbii ki, Azərbaycan enerji resurslarına malikdir, lakin müstəqil olmayan dövrdə həmin resurslardan yararlana bilmirdik. İkinci Dünya Müharibəsi zamanı faşizmə qarşı mübarizədə ən mühüm rollardan birini oynadı, SSRİ-nin neftinin 70 faizini Azərbaycan təmsil edirdi. Lakin müstəqillik dövründə iqtisadiyyatın durumu pis idi, xaos vəziyyəti vardı. Bizim qarşımızda həm də planlı iqtisadiyyatdan bazar iqtisadiyyatına, təkpartiyalı sistemdən çoxpartiyalı sistemə, totalitar rejimdən demokratik rejimə keçid dururdu. Bu gün Azərbaycanda azad cəmiyyət var, siyasi dəyişikliklər davam edir".
Bütün xəbərlər Facebook səhifəmizdə
USD
EUR
GBP
RUB