Milli Məclisin sədri Oqtay Əsədov rusiyalı həmkarı ilə görüşdü - FOTO

Bu gün Milli Məclisin sədri Oqtay Əsədov Rusiya Federasiyası Federal Məclisi Federasiya Şurasının sədri Valentina Matviyenkonun başçılıq etdiyi nümayəndə heyətini qəbul edib. SİA-nın xəbərinə görə, spiker qonağı səmimi salamlayaraq bir müddət əvvəl Almatıda MDB Parlament Assambleyasının yubiley sessiyasında görüşlərini xatırladıb. Oqtay Əsədov belə bir inamı ifadə edib ki, bugünkü görüş parlamentlərarası əlaqələrin daha da dərinləşdirilməsi sahəsində dialoqun davam etdirilməsi baxımından əhəmiyyətli olacaq.

Bildirilib ki, bu il Azərbaycanla Rusiya arasında diplomatik əlaqələrin qurulmasının 20 ili tamam olur. Bu dövrdə ölkələrimiz arasında möhkəm əməkdaşlıq ənənələri formalaşıb. Dövlət başçılarımızın qarşılıqlı səfərləri və görüşləri zamanı aparılan danışıqlar əlaqələrimizin gələcək inkişafı üçün yaxşı zəmin yaradıb. Münasibətlərimizin hüququ bazasını təşkil edən 160-dan çox dövlətlərarası sənəd imzalanıb.

Əlaqələrimizin həyatın bütün sahələrindəki dinamik inkişafı təqdirəlayiqdir. Siyasi sahədə münasibətlərimizin yüksək səviyyədə olması iqtisadi əlaqələrə də təsir göstərir. Belə ki, təkcə ötən il Azərbaycanla Rusiya arasında ticarət dövriyyəsinin həcmi 2 milyard 800 milyon ABŞ dollarından çox olub. Azərbaycanda Rusiya kapitalının iştirakı ilə 500-ə qədər müəssisə və təşkilat fəaliyyət göstərir. Ölkəmiz Rusiyanın ayrı-ayrı subyektləri ilə də iqtisadi, elmi-texniki və mədəni sahələrdə əməkdaşlıq edir.

Söhbətdə Milli Məclisin Sədri əməkdaşlığımızın daha da dərinləşməsində parlamentlərin mühüm rol oynadığını söyləyib. Bildirilib ki, hər iki ölkənin parlamentində dostluq qrupları fəaliyyət göstərir. Nümayəndə heyətlərimiz nüfuzlu beynəlxalq qurumlarda tez-tez görüşür, onları maraqlandıran məsələlər ətrafında faydalı fikir mübadiləsi aparırlar. Spiker Milli Məclislə Federal Məclis arasında yaradılmış Müştərək parlamentlərarası komissiyanın fəaliyyətini qanun yaradıcılığı sahəsində informasiya və təcrübə mübadiləsi baxımından təqdirəlayiq hesab edbi. Bildirildi ki, siyasi, iqtisadi, mədəni əlaqələrlə yanaşı, elm, təhsil, humanitar sahələrdə də münasibətlərimiz yüksələn xətlə inkişaf edir.

Görüşdə Spiker regionda böyük narahatlıq doğuran Dağlıq Qarabağ problemindən söz açaraq, ATƏT-in Minsk qrupunun həmsədri kimi Rusiyanın dəstəyi ilə münaqişənin tezliklə öz məntiqi həllini tapacağına inamını ifadə edib. Bildirilib ki, Azərbaycanın mövqeyi məlumdur. Biz problemin beynəlxalq hüquq normaları çərçivəsində ədalətli həllinə tərəfdarıq. Rusiya Prezidentinin təşəbbüsü ilə prezidentlərin on üçtərəfli görüşü keçirilib. Ümidvarıq ki, Rusiyanın yeni seçilmiş prezidenti Vladimir Putin problemin tezliklə nizama salınması naminə öz səylərini əsirgəməyəcək.

Səmimi qəbul üçün minnətdarlığını bildirən Rusiya Federasiyası Federal Məclisi Federasiya Şurasının Sədri xanım Valentina Matviyenko ölkəmizə səfərindən məmnun qaldığını söyləyərək Milli Məclisin Sədrini Rusiyaya səfərə dəvət etdi. Dəvət məmnunluqla qəbul olunub. Görüşdə qonaq dövlətlərarası münasibətlərdə parlamentlərin mühüm rol oynadığını xüsusi vurğulayaraq, qanunverici orqanlar arasında əməkdaşlığın bundan sonra da davam etdirilməsinin vacibliyini söyləyib. Bildirilib ki, parlamentlər həyatın digər sahələrində əlaqələrimizin daha da dərinləşməsinə təsir göstərmək gücündədir.

Bu gün Azərbaycanın qısa zaman kəsiyində əldə etdiyi nailiyyətlər bizi sevindirir. Strateji tərəfdaş kimi Azərbaycanla siyasi, iqtisadi, mədəni, humanitar sahələrdə gələcəkdə də münasibətlərimizi inkişaf etdirmək niyyətindəyik. Ölkələrimiz arasında ilbəil artan ticarət dövriyyəsi və münasibətlərimizin hüquqi bazasının daha da təkmilləşdirilməsi əməkdaşlığımızın gələcəyinə nikbin baxmağa imkan verir. Deputatlarımız MDB PA və digər regional qurumlarda, o cümlədən nüfuzlu beynəlxalq təşkilatlarda birlikdə səmərəli fəaliyyət göstərirlər.

Azərbaycanın gənclər siyasəti sahəsində uğurları bizim üçün də maraqlıdır. Biz Heydər Əliyev Fondunun dəstəyi ilə bu sahədə görülən işləri yüksək qiymətləndiririk. Gələcəkdə MDB PA çərçivəsində Gənclər Parlamentinin yaradılması istiqamətində məqsədyönlü addımlar atılmaqdadır. Biz bu ideyanın reallaşacağına inanırıq.

Qəbulda Dağlıq Qarabağ münaqişəsindən danışan xanım Valentina Matviyenko Rusiyanın ATƏT-in Mİnsk qrupunun həmsədrlərindən biri kimi problemin həllində bundan sonra da səylərini əsirgəməyəcəyini bildirib.

Söhbətdə parlamentlərarası əlaqələrin gələcək inkişaf perspektivləri, Rusiya Federasiyasının subyektləri ilə Azərbaycan arasında əlaqələrin inkişafı, Müştərək parlamentlərarası komissiyanın fəaliyyəti, regional münaqişələrin həlli yolları, humanitar sahədə əməkdaşlıq və digər məsələlər ətrafında fikir mübadiləsi aparılıb.

Görüşdə Milli Məclis Sədrinin birinci müavini Ziyafət Əsgərov, Sədr müavini Valeh Ələsgərov, deputatlardan Elton Məmmədov, Mixail Zabelin, ölkəmizin Rusiya Federasiyasındakı səfiri Polad Bülbüloğlu, Rusiyanın ölkəmizdəki səfiri Vladimir Doroxin və digər rəsmi şəxslər iştirak ediblər.