Milli Məclisin Azərbaycanın dövlət müstəqilliyinin 20 illiyinə həsr olunmuş iclası keçirilib-Yenilənib
Milli Məclisin Azərbaycanın dövlət müstəqilliyinin 20 illiyinə həsr olunmuş plenar iclası keçirilib. SİA-nın verdiyi xəbərə görə, iclas Azərbaycan dövlət himninin səsləndirilməsi ilə başlayıb.
Milli Məclisin sədri Oqtay Əsədov bildirib ki, sovetlər birliyinin dağılması ilə 1991-ci il oktyabr ayının 18-də dövlət müstəqilliyini bərpa edən xalqımız Azərbaycan Xalq Cümhuriyyətinin zəngin ənənələrindən istifadə edərək tarixi varislik üzərində müstəqil dövlət yaradıb: "Təəssüf ki, müstəqilliyin ilk illərində ölkəmiz çox mürəkkəb problemlərlə qarşılaşıb, çox çətin vəziyyətə düşmüşdü.
Erməni təcavüzü, xarici ölkələrin Azərbaycana qarşı təxribatı ilə üzləşmişdik. O vaxt hakimiyyət başında duranların səriştəsizliyi, ölkədə baş verən siyasi və iqtisadi tənəzzül, xaos, özbaşınalıq bu çətin vəziyyətdən çıxmağa imkan vermirdi. Bu da taleyin qisməti idi ki, xalqımızın bir əsrdə ikinci dəfə əldə etdiyi müstəqilliyi qorumaq üçün məhz ulu öndər Heydər Əliyev kimi siyasi dahi Azərbaycana gərəkdir".
O bildirib ki, bu gün İlham Əliyevin rəhbərliyi ilə bu strategiya uğurla davam etdirilir.
Daha sonra "Azərbaycan 20 il-Müstəqilliyin bərpası adlı" filim nümayiş etdirilib.
Milli Məclisin sədr müavini Ziyafət Əsgərov çıxış edərək Azərbaycanın XX əsrin əvvəllərində əldə etdiyi müstəqillikdən, o dövrdə cərəyan edən ictimai-siyasi hadisələrdən bəhs edib. Ziyafət Əsgərov eyni zamanda ötən əsrin sonlarında yenidən müstəqilliyini bərpa edən Azərbaycanın həmin dövrdə qarşılaşdığı problemlərdən söz açıb.
İqbal Ağazadə bildirib ki, 20 il yubileydir və dönüb keçmişə baxmaq, təhlil etmək, buraxılan səhvləri analiz etmək, insanların öhdələrinə düşən vəzifələri yerinə yetirib-yetirmədiklərini tarix və tarixçilər müəyyən edəcək: "20 illik dönəmdə nail olduqlarımız, müstəqilliyimizin 20 ilini qeyd etməyimiz böyük bir uğurdur. Tarixin müxtəlif məqamlarında məsuliyyəti üzərində olan şəxslərin buraxdıqları səhvlər zaman-zaman unudulacaq və Azərbaycanda barış cəmiyyəti, barış mühiti yaranacaq. Ölkədə vətəndaş sülhü və barış cəmiyyəti yaratmaqla Azərbaycan torpaqlarını işğaldan azad edək. Azərbaycanın bütün təbəqələr ərazilərimizin azad olunmasına cəlb olunsun. Çox istərdim ki, 1991-ci ilin 2 martında, bu zalda SSRİ-nin saxlanılmasının əleyhinə səs verən 43 deputatın hamısına "İstiqlal" ordeni, prezident təqaüdü verilsin. Azərbaycanda barış cəmiyyətinin yaradılması, Avropa ailəsinin bir üzvü olduğumuzu sübut etmək üçün Azərbaycanda böyük bir amnistiyaya ehtiyac var. Millət vəkili, Azərbaycanın birinci xanımı Mehriban Əliyevadan xahiş edirəm ki, həbsdə olanlara amnistiya verilməsi təklifi ilə çıxış etsin".
Deputatlar Qənirə Paşayeva, Əli Hüseynli, Rafael Cəbrayılov, Elton Məmmədov, Fəzail İbrahimli, Jalə Əliyeva, Siyavuş Novruzov da çıxış edərək tariximiz, keçmişimiz haqqında danışıblar və Azərbaycanın müstəqillik dövründə ələ etdiyi uğurlardan bəhs ediblər.
Bütün xəbərlər Facebook səhifəmizdə
USD
EUR
GBP
RUB
