"Azərbaycan və Türkmənistan arasında münasibətlər ortaq tarixə, dilə, dinə və mədəni dəyərlərə əsaslanır".
Bu fikirləri SİA-ya açıqlamasında Milli Məclisin deputatı, iqtisadi siyasət, sənaye və sahibkarlıq komitəsinin sədr müavini Azər Badamov bildirib.
Onun sözlərinə görə, uzun illər Sovet İttifaqının tərkibində yaşamış xalqlarımız müstəqillik əldə etdikdən sonra dövlətlərarası əlaqələrin inkişafına xüsusi önəm veriblər: "Türkmənistan 1992-ci ildə Azərbaycanın müstəqilliyini tanıyıb və həmin vaxtdan etibarən ikitərəfli münasibətlər davamlı inkişaf yolu keçib.
Ümummilli Lider Heydər Əliyevin Türkmənistana səfərləri münasibətlərin formalaşmasında mühüm rol oynayıb. Sonrakı dövrdə dövlət başçılarının qarşılıqlı səfərləri, beynəlxalq təşkilatlar çərçivəsində əməkdaşlıq və siyasi dialoq əlaqələrin möhkəmlənməsinə xidmət edib. Azərbaycan və Türkmənistan beynəlxalq platformalarda bir-birinin mövqelərini dəstəkləyirlər. Azərbaycan Türkmənistanın daimi neytrallıq siyasətinə hörmətlə yanaşır, Türkmənistan isə Azərbaycanın ərazi bütövlüyü və suverenliyini daim dəstəkləyib.
Türkmənistan Xalq Məsləhətinin Sədri Qurbanqulu Berdiməhəmmədovun Azərbaycana səfərləri və işğaldan azad olunmuş ərazilərlə bağlı təşəbbüsləri iki ölkə arasında qardaşlıq münasibətlərinin göstəricisidir. Eyni zamanda, dövlət başçıları arasında formalaşmış yüksək etimad siyasi əməkdaşlığın daha da dərinləşməsinə şərait yaradır.
Bu gün Azərbaycan–Türkmənistan münasibətləri strateji tərəfdaşlıq səviyyəsində inkişaf edir. İndiyədək iki ölkə arasında 120-dən çox sənəd imzalanıb. 2017-ci ildə qəbul olunmuş “Strateji Tərəfdaşlıq haqqında Birgə Bəyannamə” münasibətlərin əsas hüquqi-siyasi sütunlarından biridir.
İqtisadi əməkdaşlıq da dinamik şəkildə inkişaf edir. Azərbaycan və Türkmənistan Şərq–Qərb nəqliyyat dəhlizinin mühüm iştirakçılarıdır. Türkmənbaşı Beynəlxalq Dəniz Limanı ilə Bakı Beynəlxalq Dəniz Ticarət Limanı arasında formalaşan logistika əlaqələri Orta Dəhlizin inkişafında mühüm rol oynayır. Bakı–Tbilisi–Qars dəmir yolu və Xəzər üzərindən həyata keçirilən daşımalar Mərkəzi Asiya ilə Avropa arasında yük axınının artmasına imkan yaradır.
Enerji sahəsində əməkdaşlıq da xüsusi əhəmiyyət daşıyır. Xəzər dənizində yerləşən “Dostluq” yatağı ilə bağlı əldə olunan razılaşma iki ölkə arasında qarşılıqlı etimadın mühüm nümunəsidir. Türkmənistan qazının Azərbaycan üzərindən Avropa bazarlarına çıxarılması, eləcə də Cənub Qaz Dəhlizi ilə bağlı perspektivlər regional enerji təhlükəsizliyinin möhkəmləndirilməsi baxımından böyük əhəmiyyət kəsb edir. Bununla yanaşı, Azərbaycan, Türkmənistan və Qazaxıstan arasında “Yaşıl Dəhliz” layihəsi üzrə əməkdaşlıq gələcəyin mühüm istiqamətlərindən hesab olunur.
Türkmənistan Prezidenti Sərdar Berdiməhəmmədovun Azərbaycana rəsmi səfəri münasibətlərin inkişafında yeni mərhələ kimi qiymətləndirilə bilər. Səfər çərçivəsində keçirilən görüşlər zamanı siyasi, iqtisadi, enerji, nəqliyyat, logistika və humanitar sahələrdə əməkdaşlığın genişləndirilməsi məsələləri müzakirə olunub. İmzalanan sənədlər ticarət dövriyyəsinin artırılması, investisiyaların təşviqi, nəqliyyat-kommunikasiya əlaqələrinin genişləndirilməsi və yeni birgə layihələrin həyata keçirilməsi üçün əlavə imkanlar yaradıb. Bu sənədlər Azərbaycan–Türkmənistan strateji tərəfdaşlığının daha da möhkəmlənməsinə xidmət edir.
Perspektivdə əsas istiqamətlərdən biri tranzit və logistika imkanlarının genişləndirilməsidir. Azərbaycanın nəqliyyat infrastrukturuna yatırdığı investisiyalar, Bakı–Tbilisi–Qars dəmir yolunun imkanlarının artırılması, Bakı Beynəlxalq Dəniz Ticarət Limanının genişləndirilməsi və Zəngəzur dəhlizi layihəsi Türkmənistan üçün yeni imkanlar yaradır. Azərbaycanın Xəzər dənizində malik olduğu güclü ticarət donanması da bu prosesə mühüm töhfə verir.
Mədəni-humanitar sahədə əməkdaşlıq, ortaq tarix və mədəni irsin qorunması da münasibətlərin mühüm istiqamətlərindəndir. Elm, təhsil, mədəniyyət və texnologiya sahələrində əməkdaşlıq xalqlar arasında qarşılıqlı anlaşmanın daha da möhkəmlənməsinə xidmət edir.
Nəticə olaraq, Azərbaycan–Türkmənistan münasibətləri bu gün strateji tərəfdaşlıq səviyyəsinə yüksəlib. Siyasi dialoq, iqtisadi əməkdaşlıq, enerji və nəqliyyat layihələri, eləcə də beynəlxalq platformalarda qarşılıqlı dəstək bu münasibətlərin əsasını təşkil edir. Mövcud dinamika göstərir ki, qarşıdakı illərdə əməkdaşlıq daha da genişlənəcək və Azərbaycan–Türkmənistan tərəfdaşlığı regionun inkişafında mühüm rol oynamağa davam edəcək".
Lətifə Abdıyeva
Bütün xəbərlər Facebook səhifəmizdə
USD
EUR
GBP
RUB