Standartlaşdırma,
Metrologiya və Patent üzrə Dövlət Komitəsi yeni 16 dövlət standartını təsdiq
edib. Qurumun mətbuat xidmətindən SİA-ya verilən məlumata görə, bunlar
Standartlar İnstitutu tərəfindən işlənmiş dadverici-aromatik əlavələr və qida
aromatizatorları, ayaqqabı qüsurlarının termin və tərifləri, neft məhsulları,
maye neft məhsulları, benzin, atom-absorbsiya spektrometriya üsulu ilə
qurğuşunun kiçik qatılıqlarının təyini, atmosfer havası, cəmdək, yarımcəmdək və
dörddəbir cəmdək halında olan qaramal və dana əti, kimyəvi liflər və metalın
maqnit yaddaşı metodu üzrə dövlət standartlarıdır.
Bundan başqa, "Məhsulların sertifikatlaşdırılması üzrə orqanlara ümumi
tələblər", "Uyğunluğun qiymətləndirilməsi, "Audit və idarəetmə sistemlərinin
sertifikatlaşdırılmasını keçirən orqanlara tələblər", "Ətraf mühitin idarəetmə
sistemləri. Tətbiq etmə üzrə təlimat və tələblər" və "Əməyin mühafizəsinin
idarəetmə sistemləri. Ümumi tələblər" üzrə dövlət standartları da təsdiq olunub
"Dadverici-aromatik əlavələr və qida aromatizatorları" standartı qida sənayesi
üçün nəzərdə tutulan dadverici-aromatik əlavələr və qida aromatizatorları
sahəsində anlayışların termin və təriflərini müəyyən edir.
"Ayaqqabı. Qüsurların termin və tərifləri" standartı məmulatın hazırlanmasının və
saxlanılmasının bütün mərhələlərində yaranan və orqanoleptik aşkar olunan
ayaqqabı qüsurlarının anlayışlarına aid termin və tərifləri müəyyən edir.
"Neft məhsulları. Ultrabənövşəyi flüoressensiya" standartı oksigenin kütlə payı
2,7%-dən çox olmayan benzinlər də daxil olmaqla, avtomobil benzinlərinə,
tərkibində yağ turşusunun metil efiri 5%-dən çox olmayan (həcmə görə) dizel
yanacağı da daxil olmaqla dizel yanacaqlarına şamil edilir və kükürdün 3-dən
500 mq/kq diapazona qədər qatılığını ultrabənövşəyi flüoressensiya metodu ilə
müəyyən edir.
"Maye neft məhsulları. Benzin. Benzolun miqdarının qaz xromatoqrafiya üsulu ilə
təyini" standartı qaynama tempraturunun sonu 220 dərəcə selsidən yüksək olmayan
etilsiz benzində 0,05% həcmdən 6% həcmə qədər olan diapazonda benzolun
miqdarını təyin etmək üçün kolonkaları çevirməklə qaz xromotoqrafiya metodunu
müəyyən edir.
"Maye neft məhsulları. Atom-absorbsiya spektrometriya üsulu ilə qurğuşunun
kiçik qatılıqlarının təyini" standartı atom-absorbsiya spektrometriya üsulu ilə
benzində, qurğuşunun və onun alkil əvəzedicisinin tipindən asılı olmayaraq
2,5-10,0 mq/dm üstü 3 qatılıq intervalında qurğuşunun təyin edilməsini müəyyən
edir.
"Maye neft məhsulları. Etilsiz benzin. Oksigenli üzvi birləşmələrin və üzvi
əlaqəli oksigenin ümumi miqdarının oksigen üzrə alovlu ionizasiya detektorundan
(O-FİD) istifadə edərək qaz xromotoqrafiya üsulu ilə təyini" standartı
tərkibində 0,17% - 15% kütlə diapazonunda fərdi oksigenli üzvi birləşmələrin
miqdarını və qaynama sonu 220 dərəcə selsidən çox olmayan etilsiz benzində
kütləsi 3,7%-dək olan üzvi əlaqəli oksigenin ümumi miqdarının təyini üçün qaz
xromotoqrafiya üsulunu müəyyən edir.
"Neft məhsulları. Distillat yanacaqlarının oksidləşmə stabilliyinin təyini"
standartı intensiv oksidləşmə şəraitində distillat neft yanacaqlarının
stabilliyini müəyyən edir. Bu standart tərkibində mazut komponentləri və ya
qeyri-neft mənşəli komponentlər olan yanacaqlar üçün tətbiq edilə bilməz.
"Neft məhsulları. Qaz turbinləri üçün yanacağın termooksidləşmə stabilliyinin
təyin edilməsi. JFTOT metodu" standartı qaz turbinləri üçün yanacaqlara tətbiq
olunur və yanacaq sistemində parçalanma məhsullarının əmələ gəlmə meyliliyinin
təyini metodunu müəyyən edir.
"Atmosfer havası. Politsiklik aromatik karbohidrogenlərin (qaz və bərk
hissəciklər halında) ümumi miqdarının təyini. Nümunələrin süzgəc və sorbent
üzərinə götürülərək xromoto-kütlə spektroskopiyası üsulu ilə analizi" standartı
atmosfer havasında politsiklik aromatik karbohidrogenlərin (PAK) miqdarının
təyini zamanı nümunənin götürülməsi, hazırlanması və analizinə qoyulan
tələbləri müəyyən edir. Standart qaz və bərk hissəciklər halında olan PAK
nümunələrinin götürülməsi və onların ümumi miqdarının təyini üçün tətbiq edilir.
"Cəmdək, yarımcəmdək və dörddəbir cəmdək halında olan qaramal və dana əti"
standartı pərakəndə satış, ictimai iaşə şəbəkələri və yeyinti məqsədi ilə
sənaye emalı üçün nəzərdə tutulmuş yarımcəmdək və dörddəbir cəmdək halında olan
qaramal ətinə və cəmdək və yarımcəmdək halında dana ətinə aid edilir.
"Kimyəvi liflər. Qüsurların termin və tərifləri" standartı vizual müəyyən
edilmiş kimyəvi liflərin, jqutun, sapların, kimyəvi sapların sarınma
qüsurlarına aid anlayışların termin və təriflərini təyin edir.
"Dağıtmayan nəzarət. Metalın maqnit yaddaşı metodu. Hissə 1. Termin və
təriflər" standartı metalın maqnit yaddaşı metodundan istifadə etməklə
dağıtmayan nəzarət sahəsində prosedurlar üçün terminləri və tərifləri təyin
edir.
Qeyd edək ki, "Məhsulların sertifikatlaşdırılması üzrə orqanlara ümumi
tələblər", "Uyğunluğun qiymətləndirilməsi. Audit və idarəetmə sistemlərinin
sertifikatlaşdırılmasını keçirən orqanlara tələblər" və "Ətraf mühitin
idarəetmə sistemləri. Tətbiq etmə üzrə təlimat və tələblər" standartları
komitənin Akkreditasiya şöbəsi tərəfindən Rusiya Federasiyasının müvafiq milli
standartları əsasında, "Əməyin mühafizəsinin idarəetmə sistemləri. Ümumi
tələblər" standartı isə Belarus Respublikasının milli standartı əsasında cild
üsulu ilə hazırlanıb.
Bütün xəbərlər Facebook səhifəmizdə
USD
EUR
GBP
RUB