Daşkəsən rayonunda "İstehlakçı hüquqlarının qorunması: reallıqlar, perspektivlər" mövzusunda konfrans keçirilib. İqtisadi İnkişaf Nazirliyindən SİA-ya verilən məlumata görə, konfransda Səhiyyə, Kənd Təsərrüfatı nazirliklərinin, Standartlaşdırma, Metrologiya və Patent üzrə Dövlət Komitəsinin, Daşkəsən Rayon İcra Hakimiyyətinin, ictimai təşkilatların nümayəndələri və 160-a yaxın istehlakçı iştirak edib.
Antiinhisar Siyasəti və İstehlakçıların Hüquqlarının Müdafiəsi Dövlət Xidmətinin rəisi Zahid İsayev insanların müxtəlif mallara və xidmətlərə tələbatın artdığını, istehlakçılar öz hüquqlarının müdafiəsinə daha çox əhəmiyyət verməyə başladığını bildirib: "İstehlakçıların hüquqlarının müdafiəsinin etibarlı təminat sistemi yaradılıb, bu sahəni tənzimləyən bir sıra normativ hüquqi aktlar qəbul olunub. Dövlət Xidməti tərəfindən bu ilin yanvar-iyun ayları ərzində istehlakçıların maarifləndirilməsi məqsədilə 10 adda 20 min ədəd buklet, sahibkarların istehlakçıların hüquqlarının qorunması sahəsində vəzifələrinə dair isə 4 adda 600 ədəd yaddaş kitabçası çap edilərək sahibkarlara və istehlakçılara paylanıb. Bu istiqamətdə tədbirlər davam etdirilir. İstehlakçıların maarifləndirilməsi istiqamətində işlər görülüb. Bu sahədəki, səmərəliliyinin və kütləviliyinin artırılması məqsədilə sosial reklam çarxı hazırlanıb. "AzTV" ilə birlikdə "Keyfiyyət möhürü" adlı veriliş hazırlanır ki, bu da istehlakçıların maarifləndirilməsinə xidmət edir.
Tədbirdə bildirilib ki, 2011-ci ilin yanvar-iyun ayları ərzində saxlama müddəti ötmüş, etiketlənməsi, keyfiyyət və təhlükəsizlik göstəriciləri normativ sənədlərin tələblərinə uyğun olmayan 78,1 ton müxtəlif növ ərzaq məhv edilib.
Qanun pozuntusuna yol vermiş sahibkarlıq subyektləri barəsində İnzibati Xətalar Məcəlləsinə uyğun olaraq, inzibati xətaya yol vermiş şəxslər 575,1 min manat cərimə edilib. İstehlakçıları çaşdırmaqla haqsız rəqabətə yol vermiş təsərrüfat subyektlərinə 155 min manat maliyyə sanksiyası tətbiq olunub".
Bütün xəbərlər Facebook səhifəmizdə
USD
EUR
GBP
RUB
