Ekranda nə var, cəmiyyətdə də o var

Cəmiyyətdə baş verən neqativ hadisələrin dərhal və maneəsiz ekranlara yol tapması hər birimizi narahat etməkdədir. Bu gün həm Türkiyə, həm də Azərbaycanda televiziya kanallarında tamaşaçıların demək olar ki, hər gün rastlaşdığı və qəbullanması çətin olan mənzərə bizi dərin-dərin düşündürməlidir. Ekranlarımızda ən çox yayımlanan seriallar – zorakılıq, xəyanət, əxlaqsız münasibətlər və ailə dəyərləri ilə daban-dabana ziddiyyət təşkil edən, əksər hallarda tapdalayan süjetlərlə doludur. Göstərilənlər nə milli-mənəvi dəyərlərimizə, nə də xalqımızın mentalitetinə uyğun gəlir.

Serial qəhrəmanları sevgi adı altında fahişəliyi, kişi obrazı isə mərdlik deyil, qəddarlıq və eqoizmlə verilir. Bu obrazlar gənclərin fərqli düşünməsinə və yönəlməsinə səbəb olur. Ailələr isə hər axşam bu mənəvi pozğunluğun məhz teleekran vasitəsilə şahidi olur. Bəs nəticə? Cəmiyyətdə ailə institutuna hörmət azalır, boşanmalar artır, gənclər arasında aqressiya və əxlaqsız davranışlar çoxaldıqca və zaman keçdikcə adiləşir və normal hal kimi qəbul edilir.
Bu, təkcə əyləncə adı altında cəmiyyətə “istirahət halvası” yedirtmək deyil, bu, bir ideoloji basqıdır. Bir xalqı içindən dağıtmağın ən təsirli yolu onun mədəniyyətini, əxlaqını, ailəsini hədəf almaqdır – bunu tarix dəfələrlə sübut edib. Bugünkü “modern” seriallar da məhz bu missiyanı yerinə yetirir.
Biz kimik? Biz bu torpağın övladlarıyıq – Oğuzdan, Alp Ər Tunqadan, Dədə Qorquddan gələn, ailəyə, namusa, şəxsiyyətə müqəddəs baxan bir xalqıq. Bu millətə zorakılıqla bəzədilmiş seriallar yox, qəhrəmanlıq dastanları yaraşır. Bizə ailəni dağıdan münasibətlər yox, ailəni qoruyan dəyərlər lazımdır.
Burada məsuliyyət təkcə televiziya kanallarının deyil. Ssenari yazanlardan tutmuş aktyorlara, prodüserlərə, rejissorlara, ən əsası da bu sahədə susan ziyalıları üzərinə böyük və məsuliyyətli vəzifə düşür. Sənət insanı susmamalıdır, ziyalı səsini çıxarmalıdır. Bu tip zəhərli ssenarilər ictimai müzakirəyə çıxarılmalı, milli kimliyə və əxlaqa uyğunluğu ciddi şəkildə araşdırılmalıdır. Televiziya ekranları millətin aynasıdır. O aynada özümüzü tanımırıqsa, bilin ki, bizi biz edən hər şeyi yavaş-yavaş itiririk.
Əgər indi bu gedişata qarşı çıxmasaq, sabah daha gec olacaq. Ekranda nə varsa, cəmiyyətdə də o olacaq.
Vüqar Vəliyev