Yollarda işıq əksetdirici xüsusi siqnal dirəkləri quraşdırılır FOTOLAR

Heydər Əliyev prospektində, "Böyük Şor" yol qovşağına doğru olan istiqamətdə əsas yoldan köməkçi yola keçid üçün nəzərdə tutulmuş xüsusi hissələrdə asfalt üzərinə işıq əksetdirici siqnal dirəkləri quraşdırılıb. "Azəravtoyol" Açıq Səhmdar Cəmiyyəti tərəfindən işıq əksetdirici xüsusi siqnal dirəklərinin quraşdırılmasında məqsəd bəzi nizam-intizamsız sürücülərin köməkçi yoldan əsas yola çıxmasının qarşısını almaqdır.

Qurumun mətbuat xidmətindən SİA-ya verilən məlumarta görə, bu cür halların qarşısını almaq üçün həmin ərazilərdə bunadək xəbərdaredici yol nişanları quraşdırılıb, yolun hərəkət hissəsinə xüsusi qabarıq yol-cizgi xətləri çəkilmişdi. Ancaq yenə də bəzi sürücülər yol hərəkəti qaydalarını kobud şəkildə pozaraq köməkçi yoldan əsas yola çıxmağa cəhd göstərirdilər. Nəticədə isə digər avtonəqliyyat vasitələrinin hərəkətinə mane olurdular və qəza şəraiti yaranırdı. Hazırda sözügedən xüsusi siqnal dirəklərinin quraşdırılması ilə bunun qarşısı tamamilə alınıb.

Qeyd edək ki, işıq əksetdirici xüsusi siqnal dirəklərinin paytaxtın digər avtomobil yollarının zəruri olan hissələrində də quraşdırılması işləri aparılır.

Bu cür siqnal dirəklərinin quraşdırılması xüsusən sutkanın qaranlıq vaxtlarında avtonəqliyyat vasitələrinin normal və təhlükəsiz hərəkətinin təşkili üçün vacib bir addımdır.

Bütün xəbərlər Facebook səhifəmizdə