Əmək və Əhalinin Sosial Müdafiəsi Nazirliyinin tabeliyində olan DOST İnklüziv İnkişaf və Yaradıcılıq Mərkəzinin Qarabağ "DOST Evi" şöbəsinə benefisiarların ilk qəbulu keçirilib. Qarabağ Regional DOST Mərkəzində yerləşən şöbəyə qəbul üçün 38 vətəndaş müraciəti qeydə alınıb. Qiymətləndirmə Komissiyası tərəfindən iclasda iştirak edən 27 nəfərin müraciəti dəyərləndirilərək, bacarıqları yoxlanılıb. Onlar Floristika, Kulinariya, Təsviri incəsənət, Xalçaçılıq, toxuma və tikmə, Bədii oyma və Dərzilik istiqamətləri üzrə təlimlərə yönəldiliblər.
Şöbəyə qəbul üçün Bərdə ilə yanaşı, Ağdam şəhəri, Tərtər rayonu və ətraf kəndlərdən də vətəndaşlar müraciət edib. Burada bölgədə yaşayan həssas əhali qruplarına aid şəxslərin yaradıcılıq imkanlarının genişləndirilməsi, peşə vərdişlərinin təkmilləşdirilməsinə dəstək göstəriləcək.
Qeyd edək ki, DOST İnklüziv İnkişaf və Yaradıcılıq Mərkəzində təlimləri uğurla başa vuran 3 benefisiar hazırda Qarabağ "DOST Evi" şöbəsində təlimçi kimi fəaliyyətə cəlb olunub. Bu da həssas əhali qruplarına aid, xüsusilə əlilliyi olan şəxslərin məşğulluğunun təminatı, sosial rifahının yaxşılaşdırılması istiqamətində göstərilən dəstək tədbirlərinə töhfə olacaq. Şöbədə fəaliyyət göstərəcək təlimçilər və digər işçilərin əksəriyyəti də əlilliyi olan şəxslər, şəhid ailələrinin üzvləri və digər həssas qruplar arasından seçilir.
Qarabağ "DOST Evi" şöbəsinə qəbul prosesi hazırda davam etdirilir. Əlilliyi olan şəxslər, şəhid ailələrinin üzvləri, müharibə ilə əlaqədar əlilliyi müəyyən edilmiş şəxslər və onların övladları, valideynlərini itirmiş və ya valideyn himayəsindən məhrum uşaqlar, aztəminatlı ailələrin üzvləri müraciət edə bilərlər. Bunun üçün vətəndaşlar ilkin növbədə həmin ərazi üzrə DOST Mərkəzləri və SXA-nın yerli nümayəndəliklərində qeydiyyatdan keçməlidirlər. Təlim müddətini uğurla başa vuran şəxslərə sertifikatlar veriləcək.
Mətləb Salahov
.jpg)
.jpg)
USD
EUR
GBP
RUB
