Hikmət Şikarov: “Bu gün veteranlara qayğı siyasəti Prezident İlham Əliyevin rəhbərliyi ilə uğurla davam etdirilir”
Yeni Azərbaycan Partiyası (YAP) Pirallahı rayon təşkilatının Qadınlar Şurası faşizm üzərində qələbənin 75-ci ildönümü münasibətilə Pirallahı rayonunda yaşayan Böyük Vətən Müharibəsi iştirakçılarını təbrik edərək, onlara yardımlar təqdim edib. Partiyanın rayon təşkilatından SİA-ya verilən məlumata görə, tədbirdə iştirak edən YAP Pirallahı rayon təşkilatının sədri Hikmət Şikarov bildirdi ki, II Dünya müharibəsində faşizm üzərində qələbənin əldə edilməsində Azərbaycan xalqının xüsusi rolu olub. “Azərbaycan hərbi əməliyyat meydanına çevrilməsə də müharibənin əvvəlindən axırınadək fəal iştirak edib”, deyə qeyd edən Hikmət Şikarov həmçinin bildirib ki, Azərbaycanın bütün maddi və mənəvi sərvətləri, insan qüvvəsi faşizmə qarşı müharibəyə cəlb edilib: “Böyük Vətən müharibəsi illərində faşizmə qarşı mərdliklə döyüşən Azərbaycan oğulları və qızları öz hünərləri ilə əbədi qəhrəmanlıq dastanı yaradıblar”.
Onun sözlərinə görə, Böyük Vətən Müharibəsi iştirakçılarına böyük diqqət və qayğının göstərilməsində Ümummilli Lider Heydər Əliyevin əvəzsiz xidmətləri olub: “Müdrik dövlət xadimi Heydər Əliyevin 1994-cü il iyunun 28-də imzaladığı “Veteranlar haqqında” Qanunda bu diqqət və qayğının hüquqi əsasları müəyyənləşdirilib. Məhz Ümummilli Liderin xalqın təkidli tələbi ilə Azərbaycana rəhbərliyə qayıtması ilə veteranlar təşkilatının fəaliyyəti bərpa olunub, 9 May – Qələbə Günü yenidən dövlət bayramları sırasına daxil edilib, müharibə iştirakçılarının və əlillərinin sosial müdafiəsinin gücləndirilməsi istiqamətində ardıcıl və məqsədyönlü addımlar atılıb”.
“Bu gün veteranlara qayğı siyasəti Prezident İlham Əliyevin rəhbərliyi ilə uğurla davam etdirilir. Veteranlara dövlət qayğısı yeni səviyyəyə qaldırılıb, müharibə veteranları Prezident təqaüdünə layiq görülüb”, deyən YAP Pirallahı rayon təşkilatının sədri həmçinin bildirib ki, bu siyasət hazırda da davam etdirilməkdədir.
Yeni Azərbaycan Partiyası Pirallahı rayon təşkilatının Qadınlar Şurasının sədri Kəmalə Mustafayeva isə qeyd edib ki, Böyük Vətən Müharibəsində döyüşən Azərbaycan oğul və qızlarının qəhrəmanlıq salnaməsi müasir dövrdə Azərbaycan əsgərinə ruh yüksəkliyi verir: “Prezident İlham Əliyevin rəhbərliyi altında Azərbaycan ordusunun maddi-texniki bazası ən müasir hazırlıq səviyyəsinə qaldırılıb. Ordumuzun 2016-cı ilin aprel döyüşlərindəki uğurları bunu bir daha təsdiq edir”.
Pirallahı rayonunda yaşayan Böyük Vətən Müharibəsi veteranları onlara göstərilən diqqət və qayğıya görə ölkə Prezidenti İlham Əliyevə öz minnətdarlıqlarını bildiriblər və daim Onun ətrafında sıx birləşəcəklərini vurğulayıblar.
Rövşən RƏSULOV
Bütün xəbərlər Facebook səhifəmizdə
USD
EUR
GBP
RUB