Artıq təşkilatda əsas hesablaşmalar onunla aparılır
Müsavat partiyasının gənclər təşkilatına keçirilən sədr seçkisinin nəticələri uğursuzluq və saxtakarlıqla başa çatdıqdan sonra qurum daxilindəki vəziyyət daha gərgin həddə qədər inkişaf edib. Belə ki, müsavatçı gənclərin sərt etirazları, onların seçkiyə kəskin münasibətləri bir daha belə qənaətə gəlməyə əsas yaradır ki, bu amilin arxasında partiya rəhbərliyinin müəyyən maraqları dayanıb.
Xüsusilə, burada daha çox Müsavat partiyası mərkəzi icra aparatının rəhbəri Arif Hacılının adı hallanmaqdadır. Xatırladaq ki, saxta seçkidə rəqiblər "İctimai Palata"nın 2 aprel 2011-ci ildə icazəsiz aksiyasındakı iştirakına görə 1 ildən çox həbsdə yatan Rüfət Hacıbəyli və partiyada o qədər də tanınmayan, vaxtının çox hissəsini ABŞ-da və xarici ölkələrdə keçirən Əhliman Abbas olublar. Elan edilən şübhəli nəticəyə görə, Ə.Abbas Müsavat gənclər təşkilatına sədr seçilib. Məhz maraqlı məqam da ondan ibarətdir ki, Ə.Abbas Müsavat partiyası mərkəzi icra aparatının rəhbəri A.Hacılının fəal qruplaşma üzvlərindən hesab olunur.
R.Hacıbəyli isə Müsavat partiyası gənclər təşkilatının keçmiş sədri Tural Abbaslının yaxın dostudur. R.Hacıbəylini eyni zamanda Müsavat başqanı İsa Qəmbər də dəstəkləyib.
Onu da qeyd edək ki, gənclər təşkilatına sədrlik uğrunda ilk seçki hələ avqustun 25-də keçirilmişdi. Həmin seçkilərin nəticələri də saxta olduğu üçün növbəti seçki günü müəyyənlşdirilmişdi. Həmin vaxt bu günkü seçkidə namizəd olmuş R.Hacıbəylinin qardaşı Cavid Hacıbəyli və Rauf Məmmədli sədrlik uğrunda mübarizə aparsa da, C.Hacıbəyli qalib gəlmişdi. Daha sonra partiyanın bəzi üzvləri seçkidə saxtakarlığın olduğunu əsas gətirərək, partiya rəhbərliyinə müraciət etmişdilər. Bundan sonra seçkinin nəticələri ləğv edilmişdi.
Narazı müsavatçı gənclər: "Arif Hacılı sanki düşmənlə mübarizə aparır"
Bu arada Müsavat daxilindəki etibarlı mənbədən əldə etdiyimiz məlumata görə, məhz həmin dövrdə icra aparatının rəhbəri və hazırda Müsavat başqanlığına ən iddialı namizədlərdən hesab olunan A.Hacılının namizədi seçilmədiyi üçün seçkilərin nəticələri ləğv olunub. İndi isə, A.Hacılının digər namizədi sədr seçildikdən sonra narazı gənclər etiraza qalxıblar. Elə ötən seçkidə qalib gəlmiş, lakin nəticəsi ləğv olunduğu üçün qalibiyyəti elan olunmayan C.Hacıbəyli "facebook" səhifəsindəki statusunda A.Hacılı qruplaşmasına kəskin iradlarını bildirib . "Bütün inzibati metodlardan,üzvlərə təzyiqlərdən istifadə edənləri hər kəs bir daha gördü. Rəqabət sağlam,qərəzsiz və ləyaqətli olmalıdır. Təəssüf ki, bu belə olmayanda və bunun belə olmadığını çox insan görəndə adam təəssüflənir. İnsanları iyrəndirmək olmaz, sanki düşmənlə mübarizə aparırlarmış kimi rəqibin kamandasına qarşı əksər rəhbərliyi,strukturları işə salmaq və bunu hamının gözü qarşısında etmək yumşaq desək ədalətsizlikdir. Orada bir yol var uzaqda,o yol bizim yolumuzdur. Dönməsək də varmasaq da o yol bizim yolumuzdur".
Tural Abbaslı Arif Hacılı ilə bacara bilmir
Digər məlumata görə isə Müsavat gənclər təşkilatının sabiq sədri T. Abbaslı da A.Hacılıya qarşı çıxış edib. Eyni zamanda onun Müsavat partiyasının ehtimal olunan qurultayında A.Haıclıya qarşı alternativ olacağı qeyd olunur. Eyni zamanda T.Abbaslı və onun ətrafındakı qruplaşmanın yaxın günlərdə bütün gücləri ilə seşkinin nəticələrinin lğqv olunması istiqamətində hücuma keçəcəkləri də istisna edilmir. Lakin qurultayda başqanlıq postundan getməsi gözlənilən İ.Qəmbər tərəfdarlarının başqanlığa real namizəd olan güclü A.Hacılıya üstün gəlmələri heç də inandırıcı görünmür. Çünki vaxtilə komsomol katibi olmuş A.Hacılı artıq 20 ilə yaxındır ki, Müsavatda təşkilati strukturlara rəhbərlik edir. Eyni zamanda o da bəllidir ki, 13 il öncə Müsavatda keçirilən ilkin seçkidə Rauf Arifoğlu, Sülhəddin Əkbər, Vurğun Əyyub kimi ciddi rəqiblərinə qalib gəlməyi bacaran A.Hacılı başqanlığın bir addımlığında T.Abbaslıya heç vaxt güzəştə getməz. Çünki gənclər təşkilatının yeni sədrinin ictimai rəyə pafosla, "qəhrəmanlıq şücaəti" ilə təqdimatı belə deməyə əsas yaradır ki, onun qruplaşması son ana qədər ətrafında qalacaq.
1996-cı ildən başlayan qarşıdurmalar bu gün də davam edir
Lakin daha bir ilginc məqamlardan biri də budur ki, bu günə qədər Müsavat gənclər təşkilatına keçirilən bütün seçkilərdə A.Hacılının namizədləri İ.Qəmbərin namizədlərinə uduzub. Məsələn, xatırladaq ki, hələ 1996-cı ildə gənclər təşkilatına keçirilən seçkidə İ.Qəmbərin namizədi Zülfüqar Cuvarlı-Yusifli A.Hacılının qardaşı Mustafa Hacıbəyliyə qalib gəlmişdi. Məhz o zaman da partiya daxilində ciddi narazılıq və qarşıdurmalar yaşanmışdı. Ancaq bu dəfə belə olmadı və ilk dəfədir ki, A.Hacılının namizədi gənclər təşkilatının sədri seçildi. Bu faktor isə A.Hacılının müsavatdaxili iddialarınım gerçəkləşdiyinin göstəricisidir. Çünki bütün deyilənlərlə yanaşı, artıq təşkilatda əsas hesablaşmalar, məsləhətləşmələr də onunla aparılır.
USD
EUR
GBP
RUB