Politoloq Elman Nəsirlinin SİA-ya müsahibəsi
- Elman müəllim, Ermənistan prezidenti Serj Sarksiyanın BMT Baş Məclisindəki Azərbaycan əleyhinə çıxışı, utanmadan səsləndirdiyi ağ yalanları dünya ictimaiyyətini aldatmaq kimi dəyərləndirmək olarmı?
- Ermənistan prezidentinin BMT Baş Məclisinin 66-cı sessiyasındakı çıxışına mən diqqətlə qulaq asdım. Onun çıxışında yeni heç bir şey yox idi. Həmin köhnə ab-havasında, öz ampuasında idi və yenidən beynəlxalq ictimai fikri aldatmaq onun əsas məqsədi idi. Azərbaycan ərazilərinin 20 faizini işğalda saxlayan, aqressiv bir dövlətin başçısı BMT kürsüsündə sülhdən, təhlükəsizlikdən danışırdı. Beynəlxalq ictimai fikrə onu sırımağa, yeritməyə çalışırdı ki, guya danışıqlar prosesini və son Kazan danışıqlarını Azərbaycan pozub və heç bir halda sülhə getmir. Azərbaycan regionda sülh istəmir. Onun fikirləri təxminən belə idi. Bütün bu sərsəm bəyanatlarını söylədikdən sonra qeyd edir ki, belə bir dövləti, yəni Azərbaycanı heç bir halda BMT-nin Təhlükəsizlik Şurasına qeyri-daimi üzv qəbul etmək olmaz, bu təhlükəlidir.
Onun bu çıxışının mətni ilə tanış olduqdan sonra Sarksiyanın bəyanatlarındakı ifadələrin motivlərini, səbəblərini anlamağa çalışırsan. Mənə elə gəlir ki, burada iki amilin üzərində dayanmaq düzgün olardı. Birinci Sarksiyan ona görə, belə həyəcanlı fikirlər səsləndirdi ki, o, bu yaxın günlərin həqiqətlərini bir daha xatırladı. Azərbaycan ordusu özünün 93-cü yubileyində müasir silah və texnika ilə gücünü nümayiş etdirdi. Ermənistan isə bu yaxınlarda keçirilən hərbi paradında Rusiya ordusunun silah-sursatından istifadə etməklə, nimdaş geyimlərdə, köhnə silahlarla hərbi paraddan keçdilər. Belə bir vəziyyətdə artıq Ermənistan onun fərqindədir ki, Azərbaycan son dərəcədə güclənməkdədir. Azərbaycanın həm iqtisadi, həm hərbi potensialının güclənməsi onları narahat etməkdədir və Sarkisyanın çıxışında bu hiss olunurdu.
İkincisi Ermənistan prezidentinin sərsəm bəyanatlarının əsas səbəblərindən biri o idi ki, Azərbaycan BMT Təhlükəsizlik Şurasının qeyri-daimi üzvü olmağa son dərəcə yaxındır. Bu reallaşarsa artıq bütün parametrlər üzrə Ermənistanı üstələyən Azərbaycan dövlətinin BMT çərçivəsində, yəni diplomatik səviyyədə Ermənistana təsir etmək imkanları xeyli genişlənir.
- Azərbaycan BMT Təhlükəsizlik Şurasının qeyri-daimi üzvü seçilərsə, Ermənistana hansı təzyiq və təsir həyata keçirə bilərik?
- Biz ilk növbədə BMT Təhlükəsizlik Şurasının 1993-cü ildə qəbul etdiyi məlum 4 qətnaməsinin işlək vəziyyətə gətirilməsi üçün çox fəal bir infrastruktur, tribuna ələ edirik. Bu isə onları qorxudur. Azərbaycan BMT müstəvisində artıq digər dövlətlərə təsir etmək, qərar qəbul etmək mexanizminə malik olur. Belə olan təqdirdə təbii ki, dostlarının sayı artır.
- Azərbaycanla bağlı BMT-də müzakirə olunacaq 2 qətnamə layihəsinin qəbuluna Sarkisyanın məsuliyyətsiz çıxışı təsir göstərə bilərmi?
- Heç bir halda təsir göstərməyəcək. Sarkisyan həmin o bəyanatları verəndə özünün qoyub gəldiyi daxili auditoriyaya ünvanlanıb. Ermənistanda vəziyyət getdikcə kritik həddə çatır. Bu böhran cəmiyyətin bütün sahələrini əhatə edir. Ac-yalavac olan Ermənistan cəmiyyətində Sarkisyan Dağlıq Qarabağla bağlı verdiyi sərt bəyanatlarla sanki vəziyyəti balanslaşdırmaq, kompensasiya etmək istəyir.
Bütün xəbərlər Facebook səhifəmizdə
USD
EUR
GBP
RUB