Bu il üçün İslam Mədəniyyətinin Paytaxtı və ölkəmizin Gənclər Paytaxtı olan Naxçıvan şəhəri gündən-günə gözəlləşir, abadlaşır. Şəhərdə aparılan tikinti-quruculuq işləri həyatın bütün sahələrini əhatə edir. İdarə, müəssisə və təşkilatlar üçün yeni binaların inşası da mütəmadi olaraq diqqətdə saxlanılır. Tikilən və ya yenidən qurulan bir neçə inzibati binada artıq son tamamlama işləri aparılır.
Naxçıvan şəhərinin Xətai məhəlləsindəki “Araz” Elm-İstehsalat Birliyi, Bitkilərin Mühafizəsi və Toxumçuluq İdarəsi üçün inşa olunan binada işlər yekunlaşmaq üzrədir. Naxçıvan Muxtar Respublikası Dövlət Şəhərsalma və Arxitektura Komitəsi Naxçıvan Şəhər İdarəsinin inşaatçıları hazırda binanın həyətində abadlıq işləri aparır, ərazidə müasir işıqlandırma sistemləri quraşdırır. Binanın həyətində yaşıllıqlar da salınacaq.
Layihəyə əsasən bina 4 mərtəbədən ibarət olacaq. Birinci mərtəbədə Bitkilərin Mühafizəsi və Toxumçuluq İdarəsinin, 2-ci və 3-cü mərtəbələrdə isə “Araz” Elm-İstehsalat Birliyinin işçiləri üçün iş otaqları, akt zalı, kitabxana və digər otaqlar olacaq.
Naxçıvan şəhərinin 48-ci məhəlləsində cari il aprel ayının əvvəllərindən etibarən 200 yerlik uşaq bağçası üçün bina inşa olunur. Obyektin tikintisi Naxçıvan Şəhər Abadlıq və Təmir-Tikinti İdarəsinin inşaatçılarına həvalə edilib. İş icraçısı Şöhrət Qoçəliyevdən aldığımız məlumata görə, zirzəmi ilə birlikdə 4 mərtəbədən ibarət olacaq binanın pəncərələri salınıb, dam örtüyü vurulub, kommunikasiya xətləri çəkilib. Obyektə kifayət qədər işçi qüvvəsi cəlb edilib, onlar lazım olan tikinti materialı və geyimlə təmin olunublar. Ərazidə texniki təhlükəsizlik qaydalarına ciddi əməl edilir.
Naxçıvan Dövlət Universitetinin Tibb fakültəsinin köhnə korpusu da əsaslı şəkildə yenidən qurulur. “Gəmiqaya” Məhdud Məsuliyyətli Cəmiyyətinin inşaatçılarına həvalə olunan obyektdə işlər hazırda sürətlə davam edir. Obyektin iş icraçısı Orxan Orucovun bildirdiyinə görə, eni 6, uzunu 30 metr olan yeni korpus tikilib. Yeni tikililərin hər birində olduğu kimi, burada da yerli materiallardan istifadəyə üstünlük verilir.
Dörd mərtəbədən ibarət olacaq binanın zirzəmisində 7 laboratoriya, kitabxana, elektrik, təmizlik və qazanxana otaqları yerləşəcək. Mərtəbələrdə isə inzibati və sinif otaqları, müxtəlif auditoriyalar, anatomiya muzeyi, konfrans zalı və digər otaqlar fəaliyyət göstərəcək.
Bütün xəbərlər Facebook səhifəmizdə
USD
EUR
GBP
RUB