İyulun 16-da ADA Universitetində Kənd Təsərrüfatı Naziri Heydər Əsədov və Xarici İşlər Nazirinin müavini, ADA Universitetinin rektoru Hafiz Paşayevin iştirakı ilə Kənd Təsərrüfatı sahəsində Biznes idarəçiliyi üzrə Beynəlxalq Magistr proqramının həyata keçirilməsinə dair Anlaşma Memorandumu imzalanıb. KəndTəsərrüfatı Nazirliyindən SİA-ya verilən xəbərə görə, memorandumun əsas məqsədi aqrar sahədə yüksək ixtisaslı kadrların hazırlanması və təminatı sisteminin yaxşılaşdırılması üçün nazirliyin dəstəyi ilə ADA Universitetində müvafiq ixtisasın tədrisini səmərəli şəkildə təşkil edib həyata keçirmək.
ADA Universitetinin rektoru Hafiz Paşayev qonaqları səmimi salamlayaraq iqtisadiyyatda kənd təsərrüfatının önəmli sahələrdən biri olduğunu vurğuladı və bu proqramın uğurla həyata keçəcəyinə əminliyini ifadə etdi.
Nazir Heydər Əsədov öz səmimi təşəkkürünü bildirərək, Azərbaycanın tarixən aqrar ölkə olduğunu, ölkəmizdə həyata keçirilən aqrar siyasət, ölkə başçısının bu sahəyə göstərdiyi diqqət və qayğıdan, qəbul olunmuş qərar və sərəncamlar barədə məlumat verdi və aqrar sahədə kadr hazırlığının vacibliyini qeyd etdi. İlk dəfə imzalanan bu memorandumun "ADA" Universiteti ilə Kənd Təsərrüfatı Nazirliyi arasında əməkdaşlığa öz töhvəsini verəcəyini diqqətə çatdırdı gələcəkdə də bu əməkdaşlığın daha da inkişaf etdirilməsi üçün öz səylərini əsirgəməyəcəyini bildirdi.
17 ay davam edəcək tədris proqramını müvəffəqiyyətlə bitirənlər ADA Universitetinin magistrantı dərəcəsini qazanacaqlar. ADA Universiteti Azərbaycan Dövlət Aqrar Universiteti ilə zəruri əlaqələndimə və əməkdaşlığı həyata keçirəcək. İlk qəbul 2016-2017-ci tədris ilində nəzərdə tutulmuşdur. İxtisası seçənlər MBA tədris proqramı çərçivəsində kənd təsərrüfatı sənayesinin əsasları, iqtisadiyyatı, maliyyələşməsi, marketinqi, idarə edilməsi üzrə nəzəri fənnlər və praktiki seminarlar keçəcəklər. Magistrantlar beynəlxalq təcrübədən yararlanmaq məqsədi ilə xaricə təhsil mübadiləsi səfəri də edəcəklər.
Görüşdən əvvəl nazir Heydər Əsədov ADA Universitetinin fəaliyyəti ilə tanış oldu.
Bütün xəbərlər Facebook səhifəmizdə
USD
EUR
GBP
RUB