Qidaları isti və ya soyuq saxlayan termos qablar və termokonteynerlər düzgün istifadə edildikdə ümumiyyətlə təhlükəsiz hesab olunur. Bu qablar qidanın temperaturunu uzun müddət sabit saxlayaraq mikroorqanizmlərin sürətlə çoxalmasının qarşısını almağa kömək edə bilər. Lakin qidanın saatlarla uyğun olmayan temperatur intervalında (təxminən 5–60°C arasında) qalması bakteriyaların çoxalması riskini artırır və qida zəhərlənməsinə səbəb ola bilər.
Bu sözləri SİA-ya açıqlamasında qida eksperti Fərid Səfərov deyib.
O bildirib ki, qabın materialı da mühüm əhəmiyyət daşıyır:
“Keyfiyyətli paslanmayan poladdan və ya qida ilə təmasa uyğun sertifikatlaşdırılmış materiallardan hazırlanmış termoslarda zərərli maddələrin qidaya keçmə ehtimalı çox aşağıdır. Ancaq keyfiyyətsiz və mənşəyi məlum olmayan məhsullarda aşağı keyfiyyətli plastiklər, boyalar və ya metal örtüklər istifadə oluna bilər ki, bu da xüsusilə isti qidalarla təmas zamanı bəzi kimyəvi maddələrin qidaya keçməsi riskini artıra bilər.
Keyfiyyətsiz termos və termoqabların istifadəsi uzunmüddətli perspektivdə sağlamlıq üçün risk yarada bilər. Bundan əlavə, daxili səthi zədələnmiş, paslanmış və ya çatlamış qablar həm gigiyenik problemlərə, həm də qidanın keyfiyyətinin pisləşməsinə səbəb ola bilər.
Buna görə də termoqab seçərkən etibarlı istehsalçıların məhsullarına üstünlük vermək, qabları mütəmadi təmizləmək və qidaları uzun müddət saxladıqda onların temperaturuna nəzarət etmək vacibdir. Bu qaydalar həm qida təhlükəsizliyinin, həm də istehlakçı sağlamlığının qorunmasına kömək edir.
Sağlam qidalanaraq sağlam yaşayın”.
Ayşən Vəli
Bütün xəbərlər Facebook səhifəmizdə
.jpg)
USD
EUR
GBP
RUB