“Hansı dərmanların əl altında olması vacibdir?” “Həkim məsləhəti”

Mərkəzi Gömrük Hospitalının Təcili yardım şöbəsinin həkimi Dr.Nərgiz Kərimova sualı cavablandırıb

Bəzən insanlar lazım oldu-olmadı, “bəlkə lazım oldu”, - düşünərək müxtəlif dərmanları alıb yığaraq, saxlayırlar. Bunun bir mənası varmı və sizi qəfil hər hansı xəstəlik yaxalayarsa, bu dərmanların köməyi olurmu?

Hazırda pandemiya dövrüdür və biz tez-tez apteklərdən lazım olan dərmanların yoxa çıxmasının şahidi oluruq. Halbuki, həmin dərmanlar hər zaman əlçatan olub. Bu, ilk növbədə, həkimin təyinatı ilə müntəzəm olaraq dərmanlar qəbul edən insanlara mənfi təsir göstərir, belə ki, həmin dərmanlar birdən-birə apteklərdə defisitə çevrilir. Yadda saxlamaq lazımdır ki, hər bir xəstəlik zamanı, o cümlədən virus xəstəliklərində yaınız həkimin təyin etdiyi dərmanlardan istifadə etmək lazımdır.

Həkim xəstəyə dərman təyin edərkən, pasiyentin anamnezinin çoxlu incəliklərini, dərmanların bir-biri ilə ziddiyyətlərini, qarşılıqlı təsirinin xüsusiyyətlərini nəzərə alır. Özbaşına bu dərmanları qəbul etmək çox pis nəticələrə - ağırlaşmalara səbəb ola bilər. Hazırda elə xəstələr var ki, başqasına yazılmış reseptdən istifadə edir, bu onun xəstəliyinin ağırlaşmasına səbəb olduqda isə deyir ki, qohum da bu dərmanları qəbul edib və sağalıb. Lakin hər orqanizm eyni deyil və birinə yaxşı təsir edən hər hansı dərman başqa birisinə əks təsir göstərə bilər.

Hormonal preparatların və antibiotiklərin qəbuluna da maksimum dərəcədə ehtiyatla yanaşmaq lazımdır. Çox təəssüflər olsun ki, hazırda COVİD-19 infeksiyasının yayılması ilə əlaqədar olaraq, insanlar özbaşına olaraq belə dərmanları külli miqdarda qəbul etməklə, profilaktika məqsədilə bu cür səhvlərə yol verirlər. Özünümüalicə faydadan artıq ziyan gətirə bilər.

Əl altında saxlanılarn dərmanlara və ləvazimatlara sarğı materialları, yaraların, yanıqların və qanaxmanın qarşısını almaq üçün istifadə olunan materiallar, ağrıkəsicilər, antigistamin preparatları və sizin mütəmadi olaraq qəbul etdiyiniz dərmanlar aiddir. Bir həkim kimi məsləhət görürəm ki, hər hansı xəstəlik zamanı yalnız həkimin təyin etdiyi dərmanlardan istifadə edin, əks halda bu, sizin sağlamlığınıza zərər vura bilər.

Müəllif: Zakir Rəhimli

Bütün xəbərlər Facebook səhifəmizdə

loading...