Heydər Əliyevin anadan olmasının 89-cü ildönümü münasibətilə təşkil olunan yazı müsabiqəsinin nəticələri açıqlandı
Bu gün Gülüstan sarayında ümummilli lider Heydər Əliyevin anadan olmasının 89-cü ildönümü münasibətilə ümumtəhsil məktəbləri və peşə liseylərinin şagirdləri arasında təşkil olunan inşa yazı müsabiqəsinin nəticələrinə dair mərasim keçirilib. SİA-nın xəbərinə görə, tədbirdə çıxış edən təhsil naziri Misir Mərdanov bildirib ki, Təhsil Nazirliyi, Yeni Azərbaycan Partiyası, Heydər Əliyev Fondu, Azərbaycan Həmkarlar İttifaqları Konfederasiyası, Rabitə və İnformasiya Texnologiyaları Nazirliyinin dəstəyi ilə keçirilən müsabiqə artıq 6-cı ildir ki, təşkil olunur. Onun sözlərinə görə, 3 mərhələdə keçirilən müsabiqəyə peşə liseylərinin və ümumtəhsil məktəblərinin VII-XI sinif şagirdləri qatılıb.
"İnşa yazı müsabiqəsinin məktəb və rayon (şəhər) mərhələlərinə 700 minədək məktəbli qatılıb. Yekun mərhələnin iştirakçılarının inşa yazıları Təhsil Nazirliyi tərəfindən yaradılan komissiya tərəfindən qiymətləndirilib. Müsabiqə iştirakçılarından 5 nəfər I, 8 nəfər II, 13 nəfər III, 54 nəfər isə həvəsləndirici yerlərə layiq görülüb. İnşa yazılarında məktəblilərin ulu öndər haqqında fikir və düşüncələrini özünəməxsus səmimi hisslərlə, həm də bu dahi şəxsiyyətə dərin hörmət, sonsuz ehtiram duyğuları ilə ifadə etdikləri bildirilib. Təhsil naziri onu da qeyd edib ki, müsabiqənin respublika mərhələsində iştirak edən VII-XI sinif şagirdlərinin ümummilli lider Heydər Əliyevin şərəfli həyat yoluna, parlaq siyasi və zəngin dövlətçilik fəaliyyətinə həsr olunmuş inşa yazılarının \"Heydər Əliyev məktəblilərin gözü ilə\" adı altında ayrıca kitab şəklində nəşr olunub qaliblərə və onların oxuduqları məktəblərə hədiyyə edilməsi artıq bir ənənəyə çevrilib. Bu il də ənənəyə sadiq qalaraq hazırlanan kitab qaliblərə təqdim olunacaq".
Yeni Azərbaycan Partiyası sədrinin müavini-icra katibi, millət vəkili Əli Əhmədov müsabiqənin keçirilməsinin əhəmiyyətini yüksək dəyərləndirib. O, müstəqil Azərbaycan dövlətinin banisinin zəngin irsini, ideyalarının böyüməkdə olan gənc nəsil tərəfindən öyrənilməsinin onların dövlətçilik təfəkkürünün və baxışlarının formalaşmasına müsbət təsir göstərdiyini qeyd edib. Ə.Əhmədov ötən il olduğu kimi bu il də I, II, III yerləri tutmuş qaliblərin hər birinə gələcəkdə hansı ali məktəblərə daxil olmalarından asılı olmayaraq Yeni Azərbaycan Partiyası tərəfindən aylıq təqaüdlərin verilməsinin nəzərdə tutulduğunu mərasim iştirakçılarının diqqətinə çatdırıb. O bildirib ki, bu vaxta kimi müsabiqədə qalib gələn 22 gənc bu təqaüdlərə layiq görülüblər. Bu il də müsabiqədə qalib gələn gənclərə 4 il ərzində hakim partiyanın müəyyənləşdirdiyi təqaüd veriləcək.
Azərbaycan Respublikası Həmkarlar İttifaqları Konfederasiyasının sədri, millət vəkili Səttar Mehbalıyev ulu öndərin təhsilimizə, müəllimlərə hər zaman qayğı ilə yanaşdığını və bu məsələnin ölkə başçısı cənab İlham Əliyev tərəfindən də daim diqqət mərkəzində saxlanıldığını nəzərə çatdırıb. Millət vəkili müsabiqənin qaliblərinə nailiyyətlər arzulayaraq onların pulla mükafatlandırılacaqlarını bildirib. Belə ki, müsabiqədə I, II və II yer qazanan hər kəsə 200 manat, həvəsləndirici yer tutanlara isə 100 manat pul mükafatı verilib.
Heydər Əliyev Fondunun təmsilçisi İlqar Mustafayev fondun prezidenti Mehriban xanım Əliyevanın təbriklərini və ən xoş arzularını mərasim iştirakçılarına çatdırıb. Heydər Əliyev Fondunun ən prioritet istiqamətlərdən biri də təhsil sahəsinin olduğunu deyən İ.Mustafayev Fondun prezidenti Mehriban Əliyeva tərəfindən təhsillə bağlı həyata keçirilən layihələrdən söz açıb. O, müsabiqənin Heydər Əliyev Fondu üçün əhəmiyyətli layihələrdən biri olduğunu deyərək qeyd edib ki, Heydər Əliyev Fondun prezidenti Mehriban Əliyevanın qərarına əsasən bu müsabiqə qaliblərinin hər biri Bakıda keçiriləcək "Eurovision-2012" mahnı müsabiqəsində iştirak edəcək.
Rabitə və informasiya texnologiyaları naziri Əli Abbasov isə təhsildə tətbiq olunan yeniliklərdən danışıb. O bildirib ki, Təhsil Nazirliyi ilə hər zaman birgə əməkdaşlıq edilir və 84 azərbaycanlı gəncin xaricdə təhsil almasına Rabitə və İnformasiya Texnologiyaları Nazirliyi nəzarət edir.
Sonra I, II, III yerlərin qalibləri olan 26 nəfər və Fəxri fərmana layiq görülən 54 nəfər səhnəyə dəvət edilib. I, II, III yerlərin qaliblərinə noutbuklar, Fəxri fərmanla təltif edilənlərə isə xatirə hədiyyələri təqdim olunub.
Bütün xəbərlər Facebook səhifəmizdə
USD
EUR
GBP
RUB