Bu gün İran Mədəniyyət Günləri çərçivəsində Muzey Mərkəzində İran filmlərinin nümayişi keçirilib. SİA-nın məlumatına görə, ilk olaraq çıxış edən Mədəniyyət və Turizm Nazirliyinin Kinematoqrafiya şöbəsinin müdir müavini Müşfiq Hətəmov iki ölkə arasında olan qarşılıqlı əlaqələrdən söz açıb: "Mədəniyyət sahəsində əlaqələrimiz daha da genişlənir. Kino layihələri baxımından isə əməkdaşlığımız hələ də davam edir. Bundan sonra da bir sıra yeni layihələrin həyata keçirilməsini nəzərdə tuturuq".
Daha sonra isə kinoşünas, əməkdar incəsənət xadimi Cəmil Quliyev çıxışında bildirib ki, İran rejissorlarının lentə aldığı filmlərin keyfiyyət baxımından yaxşı olması hər kəsə bəllidir: "Çalışacağıq ki, onlarla əlaqələrimizi daha da genişləndirək".
İranlı rejissor Hüseyn Nəcəfi isə vurğulayıb ki, bugünkü tədbirdə nümayiş olunan "8-ci səma" Azərbaycan xalqının həyatından bəhs edir: "Bu mənim Azərbaycan haqqında ikinci filmimdir. Filmin çəkilişləri iki aya yaxın Məşəddə çəkilib. Mövzuya gəlincə isə Azərbaycan ailəsi Məşədə ziyarətə gedir və yollarına əngəllər çıxır. Əngəl də ondan ibarətdir ki, ailənin övladından biri ürəyi xəstə olur..."
Rejissor onu da qeyd edib ki, filmdə həm İran, həm də Azərbaycan aktyorları çəkilib. Azərbaycan tərəfdən aktyorlar Qurban Mənsimov, Xalidə Quliyeva, Zülfiyyə Əlihüseynova, İrandan isə Rəhim Novruzi, Məhəmməd Kasimi və başqaları çəkilib.
Qeyd edək ki, İran Mədəniyyət Günləri oktyabrın 7-nə kimi davam edəcək.
Bütün xəbərlər Facebook səhifəmizdə
USD
EUR
GBP
RUB