Cənubi Koreya və ABŞ “Azadlıq qalxanı”na başladı

Cənubi Koreya Respublikası və ABŞ silahlı qüvvələri martın 14-dək davam edəcək “Azadlıq qalxanı” hərbi təlimlərinə başlayıb. SİA xəbər verir ki, bu barədə “Yonhap” agentliyi məlumat yayıb.

Koreya Respublikasındakı Amerika hərbi kontingentinin bildirdiyi kimi, təlim zamanı onlar quruda, dənizdə, havada və kiberməkanda hərəkətləri, həmçinin düşmən nüvə qüvvələrinə cavab vermək üçün “kosmik aktivlərdən” istifadəni məşq edəcəklər.

Təlimlərdə BMT Komandanlığına üzv olan 12 ölkənin nümayəndələri də müşahidəçi qismində qatılıb.

Koreya Respublikası Silahlı Qüvvələrinin Baş Qərargah Rəisləri Komitəsinin rəsmi nümayəndəsi Li Sonq-Cunq deyib ki, manevrlər zamanı Şimali Koreyanın qanadlı raketlərinin aşkarlanması və ələ keçirilməsi praktikası həyata keçiriləcək.

Qeyd edək ki, ilin əvvəlində Şimali Koreya “Hvasal-2” (Strela-2) və “Pulxvasal-3-31” (“Atəş ox-3-31”) qanadlı raketlərini sınaqdan keçirib.

Bütün xəbərlər Facebook səhifəmizdə