"Davam” Anım Günü ilə bağlı fləşmob həyata keçirib - FOTO

27 sentyabr tarixində "Davam" Gənclər Hərəkatı tərəfindən 44 günlük Vətən müharibəsində canını qurban vermiş şəhidlərimizin əziz xatirəsinə həsr olunan "Anım Günü" adlı tədbir - fləşmob həyata keçirilib. SİA-nın verdiyi məlumata görə, tədbirdə "Davam"ın katibliyi, qazilər, şəhid ailələrinin nümayəndələri və 200-dən çox davamçı gənclər iştirak edib.

Tədbir şəhidlərimizin ruhunun 1 dəqiqəlik sükutla yad edilməsi ilə başlayıb. Daha sonra əllərində Azərbaycan Respublikasının və "Davam" Gənclər Hərəkatının bayraqlarını dalğalandıran davamçılar hazırladıqları fləşmobu nümayiş etdirərək canlı şəkildə, uca səslə dövlət himnini ifa ediblər. Fləşmob zamanı Anım Günü ilə bağlı sosial media paylaşımları üçün nəzərdə tutulan həştəqlərin yer aldığı plakat ictimaiyyətə nümayiş olunub. Fleşmob ərazidən keçən vətəndaşların və şəhərimizin qonaqlarının xüsusi marağına səbəb olub, onlar telefonları ilə bu anların video və foto görüntüsün çəkiblər.

Fləşmobun keçirilməsində məqsəd 44 günlük Vətən müharibəsində canını Azərbaycanın ərazi bütövlüyünün bərpası uğrunda qurban verən şəhidlərimizin Anım Gününü ictimai şəkildə qeyd etmək, cəmiyyətin diqqətini bu hadisəyə çəkərək gəncliyimizin öz Zəfər tarixini heç vaxt unutmayacağını göstərməklə birlik və vətənpərvərlik mesajı verməkdir.

Bütün xəbərlər Facebook səhifəmizdə

loading...