“Həmişəki kimi, yenə Azərbaycanda fevral, mart, aprel və may aylarının əvvəllərində kartof və soğanın qiymətinin bahalaşması müşahidə olunur. Bu, artıq ənənə halını alıb”. Bu sözləri SİA-ya açıqlamasında iqtisadçı Akif Nəsirli deyib.
Akif Nəsirli sözlərinə belə davam edib: “Azərbaycanda ölkə əhalisinin tələbatının 80-90%-ni ödəyə bilən həcmdə kartof istehsal olunur. Amma məsələ ondadır ki, bu kartof istehsalı bəzi hallarda mart, bəzi hallarda isə fevral ayında tükənir. Tükənmədən sonra kartofun qiyməti dəyişir və bahalaşır.
İndi də artıq mart ayının əvvəllərində ölkədə kartof ehtiyatının tükənməsi müşahidə edilib. Həmin dövrdən sonra kartofun qiyməti bahalaşmağa başlayıb.
Yəni, hal-hazırda Azərbaycanda satış mərkəzlərində satılan kartofların hamısı demək olar ki, idxal məhsuludur. Üstəlik, bu idxal məhsulu geniş şəkildə idxal edilmir. Xaricdən gətirilən kartofu sahibkarlar çox həssas həcmdə gətirirlər. Hazırda o dövrdür ki, artıq Azərbaycanda yeni kartofun bazara çıxması üçün günlər qalıb. Hətta bəzi bazarlarda yeni kartof piştaxtalarda görünməkdədir. Yeni kartofun çıxması ilə isə sözsüz ki, kartofun qiyməti ucuzlaşacaq. Xaricdən kartof gətirən sahibkarlar bunu nəzərə alaraq kartofun həcmini müəyyən kriteriyalara uyğunlaşdırırlar. Yəni, kütləvi şəkildə iri həcmli partiyalar idxal edilmir, xırda həcmli partiyalarla kartof idxal edilir ki, yeni kartof çıxana qədər idxal kartofu satılsın və istifadə olunsun. Anbarlarda yığılıb qalmasın. Çünki yeni kartof çıxanda qiymətlər ucuzlaşacaq. Bir tərəfdən, idxal olunan kartofun alıcısı olmayacaq, digər tərəfdən isə onun qiyməti aşağı düşəcək. Buna görə də bu keçid mərhələsində kartofun qiyməti kifayət qədər bahalaşıb. Amma demək olar ki, 1 həftədən- 10 gündən sonra yeni kartof artıq kütləvi şəkildə bazara çıxarılacaq. Azərbaycanda artıq yeni kartofun idxalına başlanacaq. Ona görə də kartofun qiyməti kifayət qədər ucuzlaşacaq. Yəni, qısa və həssas dövrdə kartofun qiyməti müxtəlif satış mərkəzlərində müxtəlif qiymətlərlə təklif olunur. Hal-hazırda 1 manat 30 qəpiklik kartof da var, 5 manata da var.
Kartofun 5 manata satılması isə artıq bazar iştirakçılarının öz marketinq strategiyasından asılıdır. Yəni, elə adamlar var ki, elitar yerlərdə özləri üçün satış mərkəzləri açıblar və bu mərkəzlərə seçilmiş, standart və təmiz kartofları təklif edirlər. Onları 4-5 manata sata bilərlər. Amma ümumilikdə kartofun 4-5 manata satılmasına razılaşmıram. Xüsusi yerlərdə belə qiymətlər ola bilər, amma ümumi bazarlarda 5 manata kartof yoxdur, ən baha 2 manatdır”.
Ayşən Vəli
Bütün xəbərlər Facebook səhifəmizdə
.jpg)
USD
EUR
GBP
RUB