İsveçrə məhkəməsi israilli iş adamını saxtakarlıqda ittiham edərək həbs edib

İsveçrə cinayət məhkəməsi brilyant satışı ilə məşqul olan İsrailli iş adamı Beni Steynmetzi korrupsiya və saxtakarlıqda günahkar bilərək böyük məbləğdə cərimə ilə 5 il həbs cəzasına məhkum edib. SİA "Reuters"ə istinadən xəbər verir ki, Steynmetz 50 milyon İsveçrə frankı (56,48 milyon dollar) həcmində cəriməni də nəzərdə tutan hökmə etiraz edəcəyini bildirib. "Bu böyük bir haqsızlıqdır", - iş adamı Cenevrə məhkəməsi binasının həyətində jurnalistlərə deyib. Qərar Steynmetz və digər iki nəfərin Qvineyanın Simandu dağlarında geoloji kəşfiyyat icazəsi almaq üçün 10 milyon dollar rüşvət ödəməkdə və bunu gizlətmək üçün saxta sənədlər düzəltməkdə ittihama əsasən verilib. Hər üç cinayətkar ittihamları rədd edir. Məhkəmə iclasına sədrlik edən hakim Aleksandra Banna Steynmetz və digər müttəhimlərin saxta hesablardan istifadə etdiklərini və cinayətlərini gizlətmək üçün sənədlərin məhv etməyə çalışdıqlarını, Steynmetzin sözügedən əməliyyatdan dərhal küllü miqdarda qazanc əldə etdiyini, Qərbi Afrika ölkəsi Qvineyaya isə bir sent belə çatmadığını bildirib. 2016-cı ildə yenidən İsrailə köçmüş keçmiş Cenevrə sakini 64 yaşlı Steynmetz milyarder və İsrailin ən varlı adamlarından biri kimi tanınır. Məhkəmənin iş adamından şəxsi sərvətinin qiymətləndirməsini soruşarkən Steynmetz bunun 50-80 milyon dollar olduğunu deyib. Steynmetz müdafiəsində rəhbərlik etdiyi 100 min nəfər işçisi olan "Beny Steinmetz Group Resources" (BSGR) şirkətinin gündəlik işində iştirak etmədiyini bildirib.

Bütün xəbərlər Facebook səhifəmizdə

loading...