"Azərbaycanda dəmir yolu taksisi fəaliyyət göstərəcək" Ülvi Mehdiyev

"Azərbaycan dəmir yolunda yeni sərnişin daşıma taksisi xidmət göstərəcək". SİA-nın verdiyi məlumata görə, bunu jurnalistlərə açıqlamasında Prezident yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev deyib.

Onun sözlərinə görə, bu xidmətin pilot olaraq 2020-ci ilin sonunadək istifadəyə verilməsi nəzərdə tutulur: "Bildiyiniz kimi, dəmiryolu şəbəkəsində sərnişin və yükdaşıma müəyyən interval əsasında həyata keçirilir. İntervalda olan sərbəst vaxtda insanlar pilotsuz dəmir yolu taksisi sifariş etməklə misal olaraq Şəkiyə və əks tərəfə hərəkət edə bilərlər. Belə bir layihə Yaponiyada tətbiq olunur. Azərbaycanda dəmir yolundan səmərəli istifadə etmək həm Azərbaycan vətəndaşları, həm də turistlər üçün sərnişin daşıma xidmətini yaratmağa hədəflənib",- deyə Ü. Mehdiyev qeyd edib.

Agentlik sədri, həmçinin əlavə edib ki, layihənin ciddi təhlükəsizlik konsepti hazırlanır və bütün sınaqlar aparıldıqdan sonra 2020-ci ilin sonlarına ilk prototip hazırlanacaq və pilot olaraq istifadəyə verilməsi nəzərdə tutulur.

Müəllif: Ceyhun Rasimoğlu

Bütün xəbərlər Facebook səhifəmizdə