"Demokratiya" Seçki Blokuna daxil olan Vətəndaş Həmrəyliyi (VHP) və Demokratik İslahatlar Partiyası (DİP) 110 dairə üzrə namizədlər siyahısında razılığa gəlib. SİA-ya açıqlamasında bu haqda VHP Siyasi Şuranın üzvü Samir Əsədli məlumat verib. O, 4 seçki dairəsinin mübahisəli olaraq qaldığını bildirib. Həmin dairələr 50 saylı Qobustan-Xızı-Quba, 70 saylı Masallı şəhər, 71 saylı Masallı kənd və 87 saylı Ağsu-İsmayıllı seçki dairələridir. S.Əsədli iki partiya sədrinin görüşündə də bu məsələnin həllini tapacağını deyib.
VHP Siyasi Şuranın üzvü irəli sürülən namizədlərin 75-nin təmsil etdiyi partiyaya, qalanının isə DİP-ə məxsus olduğunu söyləyib. Blokun qeydiyyata alınması ilə bağlı sentyabrın 9-da Mərkəzi Seçki Komissiyasına müraciətin edildiyini deyən VHP funksioneri Seçki Məcəlləsinə uyğun olaraq qeydiyyat məsələsinə 5 gün ərzində baxılmalı olduğunu qeyd edib.
S.Əsədli seçki dairələri ilə bağlı bir sıra dəyişikliklərin də olduğunu vurğulayıb: "32 saylı Suraxanı üçüncü seçki dairəsi Vətəndaş Həmrəyliyi Partiyasında idi. 8-9 seçki dairələri isə mübahisəli olaraq qalmışdı. 32 saylı seçki dairəsini Demokratik İslahatlar Partiyasına güzəştə getməklə 8-9 saylı seçki dairələrində namizəd irəli sürmək hüququna sahib olduq".
Bütün xəbərlər Facebook səhifəmizdə
USD
EUR
GBP
RUB