Azərbaycan Prezidentinin və Türkiyənin Baş nazirinin nümayəndə heyətlərinin iştirakı ilə geniş tərkibdə görüş olub
Azərbaycan Prezidenti İlham
Əliyev və Türkiyənin Baş naziri Rəcəb Tayyib Ərdoğanın nümayəndə heyətlərinin
iştirakı ilə geniş tərkibdə görüşü keçirilib. SİA-nın məlumatına görə, prezident
İlham Əliyev görüşü açaraq deyib: "Hörmətli cənab Baş nazir, əziz
qardaşım! Sizi Azərbaycanda səmimiyyətlə salamlayıram, ölkəmizə xoş gəlmisiniz.
İlk növbədə, rəhbərlik etdiyiniz partiyanın parlament seçkilərində qazandığı
inamlı qələbə münasibətilə Sizi ürəkdən təbrik edirəm, Sizə cansağlığı, yeni
uğurlar arzulayıram.
Seçkilərdən bir ay sonra Azərbaycana etdiyiniz rəsmi səfər, əslində, bizim
əlaqələrimizin nə qədər yüksək səviyyədə olmasını göstərir. Həqiqətən, bu
əlaqələr müttəfiqlik səviyyəsindədir, dostluq, qardaşlıq prinsipləri əsasında
formalaşıbdır. Hazırda bu əlaqələr bütün sahələri əhatə edir və nəinki
ikitərəfli müstəvidə, eyni zamanda regional məsələlərdə də Türkiyə-Azərbaycan
dostluğu və birliyi çox vacib amilə çevrilib.
Bu gün biz Sizinlə geniş söhbət etdik, demək olar, gündəlikdə duran bütün
məsələləri müzakirə etdik və bir daha gördük ki, bütün bu məsələlərdə bizim
mövqeyimizdə heç bir fərq yoxdur. Bu, belə də olmalıdır. Çünki bizi birləşdirən
tarixi köklər, mədəni köklər o qədər güclüdür ki, bunlar Türkiyə-Azərbaycan
əlaqələrinin inkişafında çox mühüm rol oynayır.
Mən Sizi və Sizinlə bərabər Bakıya gəlmiş bütün qardaşlarımızı bir daha
salamlayıram. Bir daha Sizə "Xoş gəlmisiniz!" deyirəm. Qısa da olsa, əminəm ki,
səfəriniz çox uğurlu və yaddaqalan olacaq".
Bütün xəbərlər Facebook səhifəmizdə
USD
EUR
GBP
RUB
